پێشبینی دەکرێت بارانبارین تا سەرەتای هەفتەی داهاتوو بەردەوام بێت

ئاڤا نیوز

پێشبینی دەکرێت لە ئەمڕۆوە بارانبارین دەست پێ بکاتەوە و تاوەکو سەرەتای هەفتەی داهاتوو بەردەوام بێت؛ پێشبینیش دەکرێت هەفتەی داهاتوو پلەی گەرما بەرز ببێتەوە.

لێدوانی فەرمی: شێخ دارا، شارەزا و پێشکەشکاری کەشوهەوای ئاڤا میدیا، گوتی: ئەو شەپۆلە بارانبارینەی ڕۆژی شەممە 7-ی ئەم مانگە دەستی پێ کردووە، تاوەکو شەممەی داهاتوو 14-ی ئەم مانگە بەردەوام دەبێت؛ پێشبینیش دەکرێت هەورەبروسکە، بای بەهێز و تەرزەیشی لەگەڵدا بێت.

لەلایەکی دیکەوە: هاوکات بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان بڵاوی کردووەتەوە: ئەمڕۆ سێشەممە 10-2-2026، ئاسمان هەوری تەواو دەبێت، لەگەڵ بارینی نمەباران لە زۆربەی ناوچەکاندا؛ پێشبینیش دەکرێت بەفر لە ناوچە شاخاوییە سنوورییەکان ببارێت.

زانیاریی زیاتر: بەپێی پێشبینییەکانی کەشناسی، خێرایی با 10 بۆ 20 کیلۆمەتر لە کاتژمێرێکدا بە ئاراستەی باشووری ڕۆژهەڵات دەبێت و مەودای بینین لە نێوان 6 بۆ 8 کیلۆمەتر دەبێت، بەڵام لە کاتی داباریندا ئەو مەودایە بۆ 4 بۆ 6 کیلۆمەتر کەم دەبێتەوە.

ئەمەش بزانە: سەبارەت بە پێشبینییەکان بۆ دوای ئەم شەپۆلە بەفر و بارانبارینە، شێخ دارا دەڵێت: "لە ڕۆژی یەکشەممە 15-2-2026ـەوە، کاریگەریی شەپۆلی دەریای سوور ڕوو لە ناوچەکە دەکات و پلەی گەرما بە شێوەیەکی بەرچاو بەرز دەبێتەوە و دەگاتە 22 پلەی سیلیزی. ئەگەر هەیە تاوەکو ڕۆژی هەینی 20-2-2026 کەشوهەوا خۆش بێت، بەڵام دواتر ئەگەر هەیە شەپۆلێکی سیبیریا بگاتە ناوچەکە و پلەکانی گەرما کەمێک دابەزنەوە."