لە چەمچەماڵ نووسەرێک 16ڕۆژە لەلایەن هێزێکی یەکێتییەوە دەستگیر کراوە

ئاڤا نیوز

لەسەر ڕەخنەگرتنێکی سادە لە فەیسبووک، لە چەمچەماڵ نووسەرێک ماوەی 16 ڕۆژە لەلایەن هێزێکی یەکێتییەوە دەستگیرکراوە، بەپێی وتەی کەسوکارەکەی تا ئێستا شوێنەکەی نەزانراوە، چەندینجار هەوڵیان داوە سەردانی بکەن، بەڵام هەوڵەکانیان بێ سوود بوون.

كەسوكاری نووسەری دیاری دەڤەری چەمچەماڵ، محەممەد ڕەئوف قوربانی؛ ڕایدەگەیێنن، كوڕەكەیان لەسەر ڕەخنەگرتنێكی ئاسایی لە تۆڕە كۆمەڵایەتییەكان، ماوەی 16 ڕۆژە لەلایەن دەسەڵاتدارانی یەكێتی لە چەمچەماڵ دەستبەسەرە و بێسەروشوێن كراوە، بەرپرسێكی ئیداریی شارۆچكەكەش بۆ ئاڤا وتی، ئەو كەسە بەپێی ماددە 2 ـی یاسای خراپ بەكارهێنانی ئامێرە ئەلیكترۆنییەكان لە ئاسایشی چەمچەماڵ دەستگیركراوە و شوێنی گرتنی دیارە و بێسەروشوێن نەكراوە.

زانیاریی بەدەستهاتوو: بەرپرسێكی ئیداریی شارۆچكەی چەمچەماڵ كە ڕازی نەبوو ئەو زانیارییە بە ناوی خۆی بڵاو بكەینەوە، تایبەت بە ئاڤا ڕایگەیاند، محەممەد ڕەئوف قوربانی، لەسەر سكاڵای هاووڵاتیانی دەڤەرەكە و بە بڕیاری دادگای چەمچەماڵ دەستگیركراوە، ئەویش بە تۆمەتی سووكایەتیكردن و بڵاوكردنەوەی هەواڵی ناڕاست و ناوزڕاندن، پاڵپشت بە ماددەی 2 لە یاسای خراپ بەكارهێنانی ئامێرە ئەلیكترۆنییەكان.

ئاماژەی بەوەشكرد، ئەو كەسە بێسەروشوێن نەكراوە، بەڵكو دەستگیركراوە و شوێنی گرتنەكەی دیارە.

لەبەرامبەردا: كەسوكاری محەممەد ڕەئوف قوربانی، كە برازای نووسەر عارف قوربانییە، دەڵێن، "كوڕەكەمان ماوەی 16 ڕۆژە لەلایەن دەسەڵاتدارانی یەكێتی لە چەمچەماڵ دەستبەسەرە، ئەویش لەسەر پۆستێكی فەیسبووك كە ڕەخنە لە قوباد تاڵەبانی، ئەندامی مەكتەبی سیاسیی یەكێتی و جێگری سەرۆكوەزیرانی كوردستان گرتووە و لە بڵاوكراوەكەی فەیسبووك نووسیویەتی؛ "كاك قوباد، نوێنەرەكانت هیچ خزمەتێكی شاری چەمچەماڵ ناكەن."