هەسەدە: هیچ هێرشێکمان بۆ سەر سەربازانی سووریا ئەنجام نەداوە

ئاڤا نیوز

هێزەکانی سووريای دیموکرات "هەسەدە" ھێرشکردنە سەر خاڵێکی سەربازی نزیک لە بەنداوی تشرین لە حەلەب ڕەت دەکاتەوە و دەڵێت "ڕووداوەکە بەھۆی تەقینەوەی مین بووە".

زانیاریی بەدەستهاتوو: ئاژانسی هەواڵی سانا لە زاری سەرچاوەیەک لە وەزارەتی بەرگری سووریا بڵاوی کردەوە، بەھۆی بۆردوومانی خاڵێکی سەربازییەوە لە نزیک بەنداوی تشرین لە لادێکانی حەلەب لەلایەن ھێزەکانی سووریای دیموکرات "هەسەدە"ـەوە، دوو سەربازی سووری کوژراون و یەکێکی دیکەش بریندار بووە.

ڕاگەیێنراوی فەرمی: ناوەندی ڕاگەیاندنی ھێزەکانی سووریای دیموکرات  ڕایگەیاند:  ھێزەکانی هەسەدە ھیچ ئۆپەراسیۆنێکیان لە ناوچەکە ئەنجام نەداوە و بەهەموو شێوەیەک ئەم هەواڵە ڕەت دەکەنەوە.

زانیاریی زیاتر: بەپێی ڕاگەیێنراوەکەی "هەسەدە"، ڕووداوەکە بەھۆی تەقینەوەی مین لە نزیک خاڵێکی سەربازی حکومەتی دیمەشق ڕووی داوە، ئەمەش ھیچ پەیوەندییەکی بەهێزەکانی سووریای دیموکراتەوە نییە.

ئەمەش بزانە: هەسەدە لەڕاگەیێنراوەکەدا پابەندبوونی خۆی بە پاراستنی سەقامگیری و ڕووبەڕووبوونەوەی هەموو ھەڕەشەیەک کە ئاسایش و ژیانی هاووڵاتیانی ناوچەکە دەکەنە ئامانج ڕاگەیاند.