ساڤایا پیرۆزبایی لە خەڵکی نەینەوا دەکات

ئاڤا نیوز

بەبۆنەی واژۆکردنی یاداشتێکی لێکتێگەیشتن لەگەڵ ئەمریکا بۆ دامەزراندنی سەنتەرێکی توێژینەوەی نێودەوڵەتی لەپارێزگاکەیان، نێردەی ترەمپ بۆ عێراق پیرۆزبایی لە خەڵکی نەینەوا دەکات. 

چیرۆکی سەرەکی: ڕۆژی چوارشەممە پارێزگاری نەینەوا یاداشتنامەی لێکتێگەیشتنی لەگەڵ پەیمانگای توێژینەوەی ئەکادیمی لە عێراق (تاری) و پەیمانگای لێکۆڵینەوە و کولتوورە کۆنەکان لە زانکۆی شیکاگۆی ئەمریکی واژۆ کرد، بۆ دامەزراندنی سەنتەرێکی توێژینەوەی ئەکادیمیی نێودەوڵەتی لە نەینەوا.

لێدوانی فەرمی: مارک ساڤایا، نێردەی دۆناڵد ترەمپ، سەرۆکی ئەمریکا بۆ عێراق ڕایگەیاند: بەبۆنەی واژۆکردنی یاداشتێکی لێکتێگەیشتن لەنێوان ئیدارەی پارێزگای نەینەوا و ئەمریکا بۆ دامەزراندنی سەنتەرێکی توێژینەوەی نێودەوڵەتی لە ناوەڕاستی مووسڵ، بە شانازی و خۆشحاڵییەکی زۆرەوە، گەرمترین پیرۆزبایی ئاڕاستەی خەڵکی ئەو پارێزگایە دەکەین. 

زانیاریی زیاتر:  ساڤایا، ئاماژەی بەوەشکرد، ئەم هەنگاوە پێگەی ڕاستەقینەی پارێزگای نەینەوا لە گۆڕەپانی جیهاندا جارێکی دیکە بەدەست دەهێنێتەوە.

ئەمەش بزانە: دۆناڵد ترەمپ، سەرۆکی ئەمریکا هەفتەی ڕابردوو بڕیارێکی دەرکرد بە دیاریکردنی مارک ساڤایا وەک نێردەی ویلایەتە یەکگرتووەکانی ئەمریکا بۆ عێراق، ئەم هەنگاوەش مشتومڕێکی بەرفراوان و بۆچوونی جیاوازی لێکەوتەوە.