دوایین زانیاریی لەبارەی ئەو چالاکوانەی 17 ڕۆژە لە چەمچەماڵ دەستگیر کراوە

ئاڤا نیوز

ماوەی 17 ڕۆژە چالاکوانێک لە چەمچەماڵ دەستبەسەر کراوە و هێزە ئەمنییەکانی سنوورەکەش هیچ ڕوونکردنەوەیەکیان لەبارەیەوە بڵاونەکردووەتەوە.

ڕاگەیێنراوی فەرمی: ڕۆژی پێنجشەممە، 30-10-2025، تۆڕی هاوپەیمانی 19 رایگەیاند، محەممەد قوربانی، چالاكوانی دیاری شاری چەمچەماڵ، ماوەی دوو هەفتەیە دەستگیر كراوە، تا ئێستاش هێزە ئەمنییەكان هیچ ڕوونكردنەوەیەكیان بۆ ڕای گشتیی نەداوە، کە پێویستە دەستبەجێ بە كەفالەت ئازاد بكرێت.

زانیاریی زیاتر: رەئوف قوربانی، باوكی دەستگیركراوەكە بە تۆڕی 19ی وتوە: كوڕەكەی خۆی چووە بۆ ئاسایش، پاشان ئاگاداركراینەوە کە دەستبەسەركراوە بەپێی یاسای قەدەغەكردنی خراپ بەكارهێنانی ئامێرەكانی پەیوەندی.

 باسی لەوەشکردووە کە "پێیان وتووم چوارشەممە ئازاد دەكرێت، ئیتر نازانم بۆ ئەمڕۆ ئازادی ناكەن و دەڵێن چوارشەممە". بنەماڵەكەیان نەیان ویستووە هیچ ڕوونكردنەوەیەک لەسەر دەستگیركردنی كورەكەیان بڵاو بكەنەوە، تاوەكو كەیسەكەی ئاڵۆزتر نەبێت و ئازاد بكرێت، بەڵام تاوەکو ئێستا ئازاد نەكراوە.

ئەوەی پێویستە بیزانیت: تۆڕی هاوپەیمانی 19، داوا دەكات محەممەد قوربانی بە كەفالەت ئازاد بكرێت، چونكە ئەو ماددەیەی پێی دەستبەسەركراوە، دەكرێت بە كەفالەتى كەسی تۆمەتبار ئازاد بكرێت.

باکگراوند: محەممەد قوربانی، چالاكوانێكی دیاری شاری چەمچەماڵە، بەردەوام لە تۆرە كۆمەڵایەتییەكان پۆستی ڕەخنەگرانە دەربارەی خراپی خزمەتگوزاری و بارودۆخی گشتیی چەمچەماڵ بڵاودەكاتەوە، پێشتریش چەند جارێك پەیوەندی بە تۆری 19 وە كردووە، ڕایگەیاندووە هەرچەندە خۆی ئەندامی یەکێتییە، بەڵام بەهۆی بیروڕاکانی فشاری لەسەر بووە.