ڕێبەر ئەحمەد: هەرێمی کوردستان نابێتە سەرچاوەی مەترسی بۆ هیچ وڵاتێک

ئاڤا نیوز

 

ڕێبەر ئەحمەد دەڵێت، هەرێمی کوردستان و کورد بەگشتیی لەگەڵ سەقامگیرییە و هیچ کاتێک "نەبووین بە هۆکاری تێکچوونی بارودۆخ و سەرچاوەی مەترسی بۆ وڵاتانی دەوروبەر و هەڵوێستمان نەگۆڕبووە، بەڵام هەمیشە هەڕەشە لە کورد کراوە".

 

لێدوانی فەرمی: ڕێبەر ئەحمەد، وەزیری ناوخۆی حکومەتی هەرێمی کوردستان لە کۆنگرەیەکی ڕۆژنامەوانیدا ڕایگەیاند، "سێ ساڵ پێش ئێستا لێکتێگەیشتنێک لەنێوان عێراق و ئێران واژۆ کرا، هەردوولا پابەندی خۆیان بۆ سەقامگیریی سنوورەکان دەربڕی، هاوکات هەرێمی کوردستانیش هەڵوێستی خۆی دەربڕی کە بەشێک بوو لە شاندی عێراق، بە کردەیی لە ماوەکانی ڕابردوو لە شەڕی ئێران - ئیسرائیل سنوورەکانی هەرێمی کوردستان ئارامترین سنووربوون و ڕێگەمان بە هیچ دزەپێکردنێک نەدا".

 

زانیاریی زیاتر؛ ڕێبەر ئەحمەد وتیشی، هەرێمی کوردستان و کورد بەگشتیی لەگەڵ سەقامگیرییە، هیچ کاتێک نەبووین بە هۆکاری تێکچوونی بارودۆخ و سەرچاوەی مەترسی بۆ وڵاتانی دەوروبەر و هەڵوێستمان نەگۆڕبووە، بەڵام هەمیشە هەڕەشە لە کورد کراوە.

 

لەلایەکی دیکە؛ لەبارەی پرۆسەی ئاشتیی لە تورکیا، وەزیری ناوخۆی هەرێمی کوردستان باسی لەوە کرد، کە پشتگیری پرۆسەی ئاشتی نێوان پەکەکە و تورکیایان کردووە و "خوازیارین پرۆسەکە سەرکەوتوو بێت و لە قۆناغی داهاتوودا هەنگاوی باشتر ببڕێت، کێشە و شەڕ لە سنوورەکانی ئێمە دووربکەوێتەوە، بۆ ئەوەی خەڵکی ئێمە بتوانن بگەڕێنەوە شوێنەکانی خۆیان و بە ئارامی بژین".