کونسوڵی بەریتانیا بە هەرزانیی هەناری هەڵەبجە سەرسام دەبێت

ئاڤا نیوز

 

لەکاتی سەردانیکردنی فێستیڤاڵی هەنار و پاییزی هەڵەبجە، ئەندرۆ بیزڵی، کونسوڵی بەریتانیا لە هەولێر بە هەرزانیی نرخی هەناری هەڵەبجە سەرسام دەبێت و دەڵێت، "هەناری هەڵەبجە زۆر هەرزانە، لە بەریتانیا یەک هەنار بە سێ هەزار دینارە، لیرە کیلۆیەک بە هەزار دینارە".

 

وێنە گەورەکە: ئەمڕۆ پێنج شەممە 11ـین فێستیڤاڵی هەنار و پاییزەی هەڵەبجە دەستیپێکرد و سێ ڕۆژ بەردەوام دەبێت؛  ئەمساڵ ئامادەکاریی زیاتر کراوە و زیاتر لە 500 کەپر و کۆشک بۆ جووتیاران دابینکراوە، چاوەڕوانیش دەکرێت هاتنی گەشتیاران بۆ فێستیڤاڵەکە لە ساڵانی پێشووتر زیاتر بێت.

لێدوانی فەرمی؛ کونسوڵی بەریتانیا کە بۆ بەشداریکردنی فێستیڤاڵەکە جلی کوردیی ستایلی هەولێر لەبەر بوو، مشکییەکیشی وەک مل پێج بەستبوو، کڵاوێکیشی لەسەر بوو، فەرەنجی هەورامانیشی لەبەر کردوو، بە ژیوار عەبدولڕەحمانی ڕاگەیاند، "هەناری هەڵەبجە زۆر هەرزانە، لە بەریتانیا یەک هەنار بە سێ هەزار دینارە، لیرە کیلۆیەک بە هەزار دینارە".

ئەو دەشڵێت، "ئەمە دووەمین ساڵە لەسەر یەک دێم بۆ ئەم فێستیڤاڵە، ساڵی ڕابردووش وەک میوان لێرە بووم، زۆرم حەز لێیە، ئەمە فێستیڤاڵێکە بۆ کولتووری کوردی، بۆ بەرهەمە کشتوکاڵییەکان، بە دڵنیاییشەوە بۆ ئەم هەنارە جوانە".

زانیاریی زیاتر؛ لەبارەی فیستیڤاڵەکە گوتی، "زۆر خۆشە کە دەبینم خەڵکێکی زۆر لێرەن، جلی کوردییان لەبەرە، بەڕاستی جەوێکی خۆشە". گوتیشی، "من زۆر حەزم لە هەناری هەڵەبجە و حەزم لە شەربەتەکەشیەتی."

ئەوەی پێویستە بیزانیت؛ لەبارەی جلەکانی، ژیوار عەبدورەحمان پرسیار لە کونسوڵی بەریتانیا دەکات و دەڵێت، "جلەکانی تۆ زۆر جوانن، دەزانی ئەمانە هی چ کولتوورێکی کوردستانن؟ کونسوڵی بەریتانیاش دەڵێت، "بەڵێ جلەکانی من هەولێرین، بەڵام هێلەگەکەم هی هەورامانە".