مەرجەکانی هاوردەکردنی ئۆتۆمبێل لە سەرەتای ساڵی 2026 ـەوە گۆڕانکاری بەسەردا دێت

ئاڤا نیوز

وەزارەتی پلاندانانی عێراق ئاشکرای کرد، لە سەرەتای ساڵی  2026 ـەوە، مەرجەکانی هاوردەکردنی ئۆتۆمبێل گۆڕانکاری بەسەردا دێت و ستانداردی عێراقی تایبەت بە ئۆتۆمبێلی هاوردە جێبەجێ دەکرێت.

وێنە گەورەکە: بە پێی دوایین ئاماری وەزارەتی بازرگانی، ژمارەی ئۆتۆمبێل لە عێراق گەیشتووەتە هەشت ملیۆن، ساڵانەش نزیکەی 200 هەزار ئۆتۆمبێل بەفەرمی هاوردەی عێراق دەکرێت.

لێدوانی فەرمی: فەیاز محەممەد عەبد، سەرۆکی دەزگای کۆنترۆڵی جۆری لە وەزارەتی پلاندانانی عێراق، ڕایگەیاند: لە 1-1-2026ـەوە، عێراق بەهیچ شێوەیەک ڕێگە نادات بەهاوردەکردنی ئۆتۆمبێلی بەکارهاتووی سووتاو و نوقمبوو، یان ئەو ئۆتۆمبێلانەی تووشی ڕووداوو و زیانی گەورە بوونەتەوە.

عەبد، ئاماژەی بەوەکرد، پێویستە ئەو ئۆتۆمبێلانەی هاوردە دەکرێن لەگەڵ پێداویستییەکانی کەشوهەوای عێراق گونجاو بن و مەرجی ڕەنگ، جۆری ئۆتۆمبێل و وڵاتی بەرهەمهێن گرنگ نییە.

شێوازی جێبه‌جێكردن: سەرۆکی دەزگای کۆنترۆڵی جۆری لە وەزارەتی پلاندانانی عێراق ڕوونیشی کردەوە،  کاتێک بازرگانێک 1000 ئۆتۆمبێل هاوردەی عێراق دەکات، دەبێت هەموو زانیارییەکانی ئەو ئۆتۆمبێلانە لە سیستەمێکی تایبەت بەوەزارەتی پلاندانان تۆمار بکات، دواتر لە ڕێگەی بەشی ئۆتۆمبێلەکانەوە لە دەزگای ناوەندیی چاودێری ئەو ئۆتۆمبێلانە دەکرێت و دوای پشکنین و دڵنیابوون لە گونجانی ئۆتۆمبێلەکە لەگەڵ ستانداردی عێراقیدا، ڕێگەی پێدەدرێت لە بازاڕەکانی عێراق مامەڵەی پێوەبکرێت.