بەغدا دەیەوێت سوود لە ئەزموونی ئاوەدانیی هەولێر وەربگرێت

ئاڤا نیوز

بەمەبەستی سوود وەرگرتن لە ئەزموونی ئاوەدانی هەولێر، شاندێکی ئەمینداریەتیی گشتیی بەغدا سەردانی هەولێر دەکەن.

چیرۆكی سەرەكی: ئەمڕۆ پێنجشەممە 30-10-2025، ئومێد خۆشناو، پارێزگاری هەولێر، لە دیوانی پارێزگا پێشوازیی لە شاندێکی ئەمینداریەتیی گشتیی بەغدا كرد، بە سەرۆکایەتیی د.عەلی حوسێن، بریکاری ئەمینداری گشتیی بەغدا کرد.

هەردوولا جەختیان لە پتەوكردنی پەیوەندییەکانی نێوان پارێزگای هەولێر و ئەمینداریەتیی گشتیی بەغدا کردەوە، بەتایبەتی لە بواری پڕۆژەکانی گەشەپێدانی شارەوانی و هاوبەشی لە بوارە خزمەتگوزارییەکاندا.

لێدوانی فەرمی: ئومێد خۆشناو، پارێزگاری هەولێر بە ئاڤای ڕاگەیاند، لەو دیدارەدا بەرنامە و پلانی حكومەتی هەرێمی كوردستان و پارێزگای هەولێرمان بۆ شاندی میوان باسكرد، لەپێناو بەردەوامیدان بە پڕۆسەی گەشەپێدانی شاری هەولێر و جێبەجێكردنی پرۆژە ستراتیژی و گرنگەكان لە سێكتەرە جۆراجۆرەكاندا.

ئاماژەی بەوەشكرد، شاندی میوان جەختیان لەسەر گرنگیی سوودوەرگرتن لە ئەزموونی هەولێری پایتەختی هەرێمی كوردستان کردەوە بۆ گەشەپێدان و ئاوەدانكردنەوەی بەغدا.

لەلایەكی دیكەوە: شاندەكەی ئەمینداریەتی بەغدا باسیان لەو پرۆژانە كرد كە ئێستا لە شاری بەغدا جێبەجێ دەكرێن لەپێناو پاراستنی تەلارە دێرین و مێژوییەكانی شارەكە و نۆژەنكردنەوەی شەقام و باڵەخانەكان بەهەمان دیزاینی دێرینی خۆیان و دابینكردنی خزمەتگوزارییەكان بۆ دانیشتووانی بەغدا، بۆ ئەم مەبەستەش ئومێدیان خواست هەولێر وەک شارێکی گەشاوە و پێشکەوتوو هاوکاریان بێت.