وەزیری پەروەردە لەڕێگەی ئاڤاوە سوپاسی مامۆستاكەی سیدەكان دەكات

ئاڤا نیوز

وەزیری پەروەردەی هەرێمی كوردستان، لەڕێگەی ئاڤاوە، سوپاسی ئەو مامۆستایەی قەزای سیدەكان دەكات كە ڕۆژانە بە ئۆتۆمبێلەكەی خۆی، هاتووچۆ بە قوتابییانی قوتابخانەكەی دەكات.

چیرۆكی سەرەكی: مامۆستا جیهاد، لە ساڵی 2019ـەوە لە قوتابخانەی پێواز لە قەزای سیدەكان وەك مامۆستای وانەبێژ دەستبەكار بووە و لە ساڵی پارەوە كراوەتە گرێبەست، ماوەی حەوت ساڵە بەیانییان بە ئۆتۆمبێلەكەی، نۆ قوتابی لەگەڵ خۆی دەبات بۆ قوتابخانە كە مەودای چوار كیلۆمەتر لێیانەوە دوورە، لەوسەریشەوە دەیانباتە ماڵەوە، دوای باسكردنی چیرۆكی دڵسۆزی ئەو مامۆستایە لە ئاڤا میدیا و بڵاوكردنەوەی چیرۆكەكەی لە دیجیتاڵ میدیای ئاڤا، وەزیری پەروەردە سەرنجی بۆ دەنووسێت و سوپاسی دەكات.

پەیامی فەرمی: د. ئالان حەمەسەعید، وەزیری پەروەردەی هەرێمی كوردستان، كۆمێنتێك بۆ سۆشیال میدیای ئاڤا دەنووسێت و دەڵێت: "سوپاس مامۆستا گیان، ئێوە نموونەی ڕێز و خزمەتكردنن، دەستخۆش."

پەیوەست بەم بابەتە: مامۆستا زێرۆ ئەحمەد، بەڕێوەبەری قوتابخانەی پێوازە لە سیدەكان بە ئاڤای وت، "ئێمە سوپاسی مامۆستا جیهاد دەكەین، نەک تەنیا قوتابییەكان، هەندێک جار هاتووچۆش بە مامۆستاکانیش دەکات، سەرباری ئەوەش، یەک ڕۆژیش لە دەوام دوانەکەوتووە و لەکاتی خۆیدا لەناو پۆلدایە.