ئیسرائیل ناوچەکانی کەرتی غەززە بۆردومان دەکات

ئاڤا نیوز

درەنگانی شەوی ڕابردوو فڕۆکەکانی سوپای ئیسرائیل هێرشیان کردە سەر ڕۆژهەڵاتی خانیونس لە باشووری کەرتی غەززە، لە چوارچێوەی ڕێککەوتنی ئاڵوگۆڕی تەرمی دیل و بارمتەکان، ئیسرائیل تەرمی 30 دیلی فەڵەستینی ڕادەست دەکات. 

 
چیرۆکی سەرەکی:  دوای 21 ڕۆژ لەڕاگرتنی هێرشەکانی ئیسرائیل بۆ سەر کەرتی غەززە، لە چوارچێوەی ڕێککەتننامەی ئاشتی نێوان فەلەستین و ئیسرائیل، شەوی ڕابردوو، فڕۆکەکانی سوپای ئیسرائیل هێرشیان بۆ سەر کەرتی غەززە دەستیپێکردەوە. 

ڕاگەیێنراوی فەرمی: بەگوێرەی میدیا عەرەبییەکان،  فڕۆکەکانی سوپای ئیسرائیل هێرشیان کردووەتە سەر ڕۆژهەڵاتی خانیونس لە باشووری کەرتی غەززە، هاوکات تۆپخانە و زرێپۆشەکانی ئیسرائیلیش ڕۆژهەڵاتی خانیونس و ناوچەکانی ڕۆژهەڵاتی شاری غەززەیان بۆردومان کردووە.

زانیاریی زیاتر: بەپێی سەرچاوەیەک لە نەخۆشخانەی مەعمەدانی، گەنجێکی فەڵەستینی بە تەقەی سوپای ئیسرائیل لە گەڕەکی شوجاعییە لە ڕۆژهەڵاتی شاری غەززە  کوژراوە و برایەکیشی بەسەختی بریندار بووە.

لە لایەکی دیکەوە: کۆمەڵگەی پزیشکی ناسر ڕایگەیاند، 30 تەرمی دیلی فەڵەستینی لەلایەن ئیسرائیلەوە گەیشتووەتە دەستیان، ئەمەش لە چوارچێوەی ڕێککەوتنی ئاڵوگۆڕکردنی دیل و بارمتەکان لەگەڵ بزووتنەوەی حەماسدا.