لە ئەنقەرە؛ عەلی باپیر لەگەڵ بەرپرسانی ئاک پارتی پرۆسەی ئاشتی تاوتوێ دەكات

ئاڤا نیوز

لەمیانی سەردانەكەی بۆ توركیا، سەرۆكی كۆمەڵی دادگەری لەگەڵ بەرپرسی پەیوەندییەكانی ئاک پارتی و ژمارەیەك بەرپرسی ئەو حیزبە كۆ دەبێتەوە.

چیرۆكی سەرەكی: لە پەراوێزی بەشداریكردنی لە كۆڕبەندی (کورد لە تورکیا، برایەتی و ئاشتیی کۆمەڵایەتیی..داهاتووی هاوبەش)، عەلی باپیر، سەرۆكی كۆمەڵی دادگەری لەگەڵ بەرپرسانی ژمارەیەك پارت و لایەنی سیاسیی توركیا كۆ بووەوە.

لەو چوارچێوەیەشدا، شاندی كۆمەڵی دادگەری، سەردانی بارەگای سەرەكیی پارتی داد و گەشەپێدان (ئاک پارتی)ـیان کرد لە ئەنقەرە، و لەلایەن زافر ساریكای، بەرپرسی پەیوەندییەكان و ژمارەیەک لە لێپرسراوانی ئاک پارتی پێشوازییان لێ کرا.

لێدوانی فەرمی: نووسینگەی ڕاگەیاندنی سەرۆكی كۆمەڵی دادگەری ڕایگەیاندووە، لە دانیشتنەکەدا، هەردوولا هاوڕا بوون لەسەر پتەوکردنی دۆستایەتیی نێوان كۆمەڵی دادگەری و ئاك پارتی و پتەوكردنی زیاتری پەیوەندییەکان. جگەلەوەش، عەلی باپیر جەختی لە گرنگیی ستراتیژیی كۆماری توركیا لە ناوچەكەدا كردەوە و ئاماژەی بە بایەخی ئەم وڵاتە بۆ عێراق و هەرێمی کوردستان دا.

هیواشی خواست، پرۆسەی ئاشتی لە تورکیا، هەنگاوەکانی کاراتر بکات بۆ ئەوەی هەموو گەلانی تورکیا بە ئاسوودەیی بژین و سەقامگیریی یەکجارەكی لە ناوچەکەدا فەراهەم بێت.