تورکیا: قەبارەی بازرگانیمان لەگەڵ عێراق دەگاتە 30 ملیار دۆلار

ئاڤا نیوز

عومەر پۆڵات، وەزیری بازرگانیی تورکیا، متمانەی خۆی بەوە دەربڕی کە قەبارەی ئاڵوگۆڕی بازرگانیی نێوان وڵاتەکەی و عێراق لە ماوەی مامناوەنددا دەگاتە 30 ملیار دۆلار. هەروەها دووپاتی کردەوە کە پەیوەندییە ئابوورییەکانی نێوان هەردوو وڵات لە چەندین بواردا بە خێرایی لە فراوانبووندان.

چیرۆکی سەرەکی: ڕۆژی پێنجشەممە 30-10-2025،  عومەر پۆڵات، وەزیری بازرگانیی تورکیا، سەردانی بەغدای کرد و لەگەڵ ئەثیر غریری هاوتا عێراقییەکەی دووەم کۆبوونەوەی لیژنەی ئابووری و بازرگانی عێراق و تورکیایان بەست، کە ئامانجی پەرەپێدانی پەیوەندییەکانی نێوان هەردوو وڵاتە.

ڕاگەیێنراوی فەرمی: وەزارەتی بازرگانیی تورکیا ئەمڕۆ هەینی 31-10-2025 لە زاری وەزیری بازرگانیی تورکیا،  ڕایگەیاند: قەبارەی ئاڵوگۆڕی بازرگانیی نێوان تورکیا و عێراق لە ماوەیەکی کورتدا دەگاتە 20 ملیار دۆلار و لە ماوەیەکی مامناوەندیشدا دەگاتە 30 ملیار دۆلار.

زانیاریی زیاتر: ڕاگەیێنراوەکەی وەزارەتی بازرگانیی تورکیا ئاماژەی بەوەدا، وەزیری بازرگانی لە سەردانەکەیدا بۆ بەغدا سەرۆکایەتی شاندێکی زیاتر لە 100 بازرگانی تورکی و 19 کۆمپانیا لە سێکتەرە جیاوازەکاندا کردووە.

ئەمەش بزانە: پۆڵات ئاماژەی بەوەدا کە هەناردەکانی تورکیا بۆ عێراق لە ماوەی نۆ مانگی ساڵی 2025 ـدا گەیشتووەتە 8.7 ملیار دۆلار، کۆمپانیا تورکییەکانیش هەزار و 145 پڕۆژەیان لە عێراقدا بە بەهای گشتی 36.6 ملیار دۆلار جێبەجێ کردووە.