بەڕێوەبەری گەشتوگوزاری هەڵەبجە: پلانمان ئەوەیە فێستیڤاڵی هەنار بەنێودەوڵەتی بكەین

ئاڤا نیوز

بەڕێوەبەری گەشتوگوزاری هەڵەبجە ڕایدەگەیێنێت، پلانمان ئەوەیە لە ساڵی داهاتوودا، فێستیڤاڵی هەناری هەڵەبجە بەنێودەوڵەتیی بكەین، ئاماژەی بەوەشكرد، ئەمساڵ لە ڕۆژانی سەرەتای فێستیڤاڵەكەوە سێ ئەوەندەی ساڵانی ڕابردوو، گەشتیار و سەردانیكار ڕوویان لە هەڵەبجە كردووە.

چیرۆكی سەرەكی: یازدەمین فێستیڤاڵی هەناری هەڵەبجە دەستیپێكرد، لەپاڵ خستنەڕووی بەرهەمی هەناری ناوچەكە، چەندین بەرهەمی دیكەی كشتوكاڵی و ئاژەڵی نمایشكراون، ئێستا فێستیڤاڵەكە زیاتر خەسڵەتی پێشانگایەكی هونەری و كولتوری وەرگرتووە و بووەتە ڕووێكی قەشەنگی گەشتیاری بۆ هەرێمی كوردستان.

لێدوانی فەرمی: چیا قاسم، بەڕێوەبەری گشتیی گەشتوگوزاری هەڵەبجە تایبەت بە ئاڤا ڕایگەیاند، ئەمەی دەیبینن؛ فێستیڤاڵێك نییە بۆ خستنەڕووی بەرهەمێكی دیاریكراو، بەڵكو فێستیڤاڵێكی كولتووریە و دووپاتكردنەوەی پەیامی خۆشەویستییە بۆ هەڵەبجە، تا بیسەلمێنن گەلێكی زیندوو و ئاشتیخوازین.

زانیاریی زیاتر: بەڕێوەبەری گەشتوگوزاری هەڵەبجە ئاماژەی بەوەشكرد، هاتنی ئەو ژمارە زۆرەی گەشتیاران و سەردانیكاران، پێشبینیكراو بوو؛ لە یەكەم ڕۆژەكانی فێستیڤاڵەكە، سێ ئەوەندەی ساڵانی ڕابردوو، سەردانیكار ڕوویان لە هەڵەبجە كردووە و لە هەر چوار پارچەی كوردستان، میوانمان هاتوون، جگە لە هاتنی كۆمپانیا جیهانییەكان لە وڵاتان و سەردانیكردنی ژمارەیەكی بەرچاوی دیپلۆماتكاران و كەسانی بیانی، كە وایكردووە پلان بۆ ئەوە دابنێین لە ساڵانی داهاتوودا، فێستیڤاڵەكە بكەینە بۆنەیەكی نێودەوڵەتی و شوێنێكی فراوانتر بۆ بەڕێوەچوونی فێستیڤاڵەكە دابین بكەین.

خاڵی ئەرێنی:

- لە ساڵانی ڕابردوو، فێستیڤاڵەكە تا كاتژمێر حەوتی ئێوارە بەردەوام بوو، ئەمەش بۆ پاراستنی بەرهەمی جووتیاران، بەڵام ئەمساڵ بەهاوكاری و هەماهەنگی هێزە ئەمنییەكان و پۆلیسی هاتووچۆ، فێستیڤاڵەكە تا درەنگانی شەو بەڕووی سەردانیكاران كراوە دەبێت.

- بە هاتنی ژمارەیەكی زۆری گەشتیاران، ناوچە گەشتیارییەكانی هەڵەبجە بووژاونەتەوە؛ هەفتەیەك بەر لە دەستپێكردنی فێستیڤاڵەكە، سەرجەم هۆتێل و مۆتێلەكانی ناوچەكە لەلایەن گەشتیاران و سەردانیكارانەوە حیجز كراون.

- یازدەمین كۆپیی فێستیڤاڵی هەناری هەڵەبجە، لەڕووی ڕێكخستن و پاراستنی ئەمنییەتەوە، لە ساڵانی ڕابردوو باشترە و ئامادەییەكی زیاتری بۆ كراوە.

- پرۆژەی فراوانی وەبەرهێنان بۆ زیادكردنی شوێنی حەوانەوە بۆ گەشتیاران و سەردانیكاران، لە ساڵانی ئاییندەدا جێبەجێ دەكرێت.