ئاڤای خەڵک؛ وەرزشوانانی سیدەکان داوای یاریگایەکی تۆپی پێ دەکەن

ئاڤا نیوز

وەرزشوانان و تیپە وەرزشییەکانی قەزای سیدەکان، بەهۆی نەبوونی یاریگایەکی ستانداردی تۆپی پێ، ڕووبەڕووی چەندین کێشە بوونەتەوە و داوای دروستکردن و چاککردنی یاریگا گەورەکەیان دەکەن کە لە ئێستادا خۆڵە و چیمەن نییە. بەرپرسانی ئیداریش بەڵێنی جێبەجێکردنی پڕۆژەکە دەدەن.

چیرۆکی سەرەکی: قەزای سیدەکان خاوەنی زیاتر لە 20 تیپی تۆپی پێیە و ژمارەیەکی زۆر وەرزشوانی بەتوانا لە سنورەکەدا هەن، بەڵام تەنیا یەک یاریگای گەورەی 11 یاریزانی هەیە کە ئەویش خۆڵە و چیمەن نییە. ئەم دۆخە بووەتە هۆی ئەوەی ساڵانە چەندین خولی تۆپی پێ لەسەر خۆڵ بەڕێوەبچێت.

زانیاریی بەدەستهاتوو: کرێکار قادر، یەکێک لە وەرزشوانانی سنورەکە، بە ئاڤای ڕایگەیاند: "چەندین جار داوای یاریگایەکی چیمەنمان کردووە، بەڵام تا ئێستا بۆمان نەکراوە. کاتێک خولێک دەکرێتەوە، لەبەر تۆز و خۆڵ و قور و لیتە زۆرجار یاریزانەکان تووشی پێکان دەبن."

لێدوانی فەرمی: ئیحسان چەلەبی، قایمقامی قەزای سیدەکان بە ئاڤای ڕایگەیاند: "لە ئێستادا دیزاین و دەرخستە و ڕەزامەندی پڕۆژەکە وەرگیراوە و تەنیا لەسەر ئیدارەی سەربەخۆی سۆران ماوە کارەکە جێبەجێ بکەن. لە کاتێکی نزیک و لەگەڵ دابینکردنی پارە، دەست بە دروستکردنی یاریگاکە دەکرێت."