دوو گەشتیار لە فەرەنساوە بە پایسکیل هاتوون بۆ کوردستان و سەرسامن بە سەقامگیرییەکەی

ئاڤا نیوز

دوو گەشتیاری فەرەنسی، دوای بڕینی هەزاران کیلۆمەتر بە پاسکیل بە وڵاتانی تورکیا، ئەرمینیا، و جۆرجیا و چەندین وڵاتی تردا، گەیشتنە کوردستان،  ئێستا لە دهۆکن، دەڵێن هیچ یەکێک لەو وڵاتانەی بینیویانە وەکو کوردستان خۆش و دڵگیر نەبووە.

چیرۆکی سەرەکی: ماتیس و میلیا، دوو گەشتیاری فەرەنسی، کە بۆ یەکەمجار سەردانی کوردستان دەکەن، بە پایسکیل هاتوون ماوەی پێنج ڕۆژە لە دهۆکن سەردانی ناوچەی زاویتەیان کردووە و بە نیازن جوانیی سرووشتی کوردستان وێنە بگرن و بیبەنەوە بۆ وڵاتەکەی خۆیان، بۆ ئەوەی بڵاوی بکەنەوە و جیهان بزانێت کوردستان "چ وڵاتێکی جوان و سەقامگیر و ئارامە."

لێدوانی فەرمی: ماتیس ئەخنۆ و میلیا کەغیزوس کوچ بە ئاڤایان وتووە: "ئێمە زۆر وڵات بە پاسکیل گەڕاوین، بەڵام هیچکام لەوانە بە قەد کوردستان خۆش و دڵگیر نەبوون. میواندۆستیی خەڵکی کوردستان بێ وێنەیە و سرووشتەکەی جوان و دڵڕفێنە."

زانیاریی زیاتر: پلان وایە دوای دهۆک، سەردانی ئامێدی بکەن، پاشان بەرەو بارزان و لە کۆتاییشدا هەولێر. بڕیارە سیمینارێک لەگەڵ فیدراسیۆنی شاخەوانی کوردستان لەسەر سرووشتی کوردستان ئەنجام بدەن. پێشتر ئەم دوو گەشتیارە تەنیا لە ڕێگەی یوتیوب و وێنەوە کوردستانیان بینیبوو، ئێستا کە بە چاوی خۆیان بینیویانە، دەڵێن: "خۆزگە زووتر دەهاتین و دواکەوتووین"، بەڵێنیشیان داوە کە هەوڵ دەدەن جارێکی تر بگەڕێنەوە بۆ کوردستان.