کاروانێکی سەربازیی ئەمریکا لە بنکەی عەین ئەسەد دەکشێتەوە

ئاڤا نیوز

بۆ دەستپێکردنی کشانەوەی هێزەکانی ئەمریکا لە عێراق، ئەمڕۆ کاروانێکی سەربازی ئەو هێزانە لە بنکەی عەین ئەسەد لە ڕۆژئاوای ئەنبار کشانەوە.

وێنە گەورەکە: لە چوارچێوەی ڕێککەوتنی نێوان بەغدا و واشنتن بۆ کۆتاییهێنان بە ئەرکی هاوپەیمانی نێودەوڵەتی ، لەسەر بنەمای کارەکانی لیژنەی باڵای سەربازی و بەیاننامەی هاوبەشی ئەیلوولی 2024، خشتەیەکی کاتی دانراوە بۆ کەمکردنەوەی بوونی سەربازی و گۆڕینی پەیوەندییەکان بۆ هاوبەشیی ئەمنیی دووقۆڵی، لەگەڵ ڕادەستکردنی بنکە سەربازییەکانی وەک عەین ئەسەد بە دەسەڵاتە عێراقییەکان لە ماوەی ساڵانی 2025 و 2026دا.

زانیاریی بەدەستهاتوو: بەیانی ئەمڕۆ دەیان بارهەڵگر لە بنکەی عەین ئەسەدەوە بەرەو ڕێگای خێرای ئەنبار بەڕێکەوتوون و لەلایەن چەندین هیلیکۆپتەری "ئەپاچی"یەوە پاسەوانییان کراوە، تا ئێستاش بە وردی دیار نییە ئاراستەی کاروانەکە بەرەو بنکەی هەریرە لە هەولێر، یان بەرەو بنکەکانی ئەمریکا لە حەسەکەی سووریا دەچن.

ئەوەی پێویستە بیزانیت: ئەمە یەکەم جووڵەی سەربازیی لەو شێوەیەیە لە سەرەتای ساڵی 2026 ـدا. چاودێرانیش پێیان وایە ئەم هەنگاوە ئاماژەیەکی نوێیە بۆ کۆتاییهاتنی تەواوەتیی ئەرکی ئەو هێزانە لەو بنکەیەدا لە مانگەکانی داهاتوودا.

باکگراوند: چەند ڕۆژێک لەمەوبەر محەممەد شیاع سوودانی، سەرۆکوەزیرانی عێراق ڕایگەیاندبوو، وەزارەتی بەرگری لە وەرگرتنی بەرپرسیارێتیی تەواوی بنکەی عەین ئەسەد زۆر نزیک بووەتەوە و لەماوەی چەند ڕۆژی داهاتوودا ئەو بنکەیە وەردەگرنەوە.