ئامارێکی ترسناک لەبارەی کەمبوونەوەی ژمارەی دانیشتووانی غەززە بڵاو دەکرێتەوە

ئاڤا نیوز

دەزگای ناوەندیی ئاماری فەلەستین لە ڕاپۆرتێکی نوێدا هۆشداریی لە دۆخی دیمۆگرافیی کەرتی غەززە دەدات و ئاشکرای دەکات، بەهۆی جەنگی وێرانکەرەوە ژمارەی دانیشتووانی کەرتەکە بە ڕێژەیەکی زۆر  کەمی کردووە.

وێنە گەورەکە: دوای ڕاگەیاندنی ئاگربەست لە کەرتی غەززە، بەهۆی سەرما و سۆڵە و نەبوونی خۆراک و پێداویستی ڕۆژانە بە پێی پێویست، دانیشتووانی کەرتەکە بە ناچاری ئاوارە دەبن.

ژمارەکان وا دەڵێن: بەگوێرەی ڕاپۆرتەکە، بەراورد بە ساڵی 2023، ژمارەی دانیشتووانی کەرتی غەززە 254 هەزار کەس کەمی کردووە، ئێستا تەنیا دوو ملیۆن و 13 هەزار کەس لە غەززە ماونەتەوە.

٠ لە دوای حەوتی ئۆکتۆبەری 2023 ـەوە تا کۆتایی 2025، زیاتر لە 72 هەزار کەس گیانیان لەدەستداوە لەنێویاندا 18 هەزار و 592 منداڵ و 12 هەزار و 400 ژن هەن، 98%ـیان دانیشتووی غەززە بوون.

٠ ژمارەی بریندارەکان گەیشتووەتە 171 هەزار و 195 کەس، هاوکات 11 هەزار کەسیش تا ئێستا بێسەروشوێنن.

٠ نزیکەی دوو ملیۆن کەس لەناوخۆی کەرتەکەدا ئاوارە بوون و 100 هەزار کەسیش ناچار بوون غەززە بەرەو ناوچەی دیکە جێبهێڵن.

لەلایەکی دیکەوە: ئاژانسی ئۆنروا ڕایگەیاندووە، سەرما و بارانی زستان دۆخی ئاوارەکانی قورستر کردووە، بە جۆرێک زیان بە 92 هەزار خێمە و 17 باڵەخانە گەیشتووە، ئۆنروا هۆشداری دەدات لەوەی گەمارۆ و نەبوونی کەرەستەی پێویست، ژیانی منداڵان و بەتەمەنەکانی لەنێو خێمەی سارد و تەڕدا لە مەترسی دایە.