دۆخی حەزرەمەوت لە یەمەن بەرەو ئاڵۆزی دەچێت

ئاڤا نیوز

بە مەبەستی گەڕاندنەوەی پێگە سەربازییەکان لە هێزەکانی ئەنجوومەنی ڕاگوزەری باشوور، پارێزگاری حەزرەمەوت ئۆپەراسیۆنی "وەرگرتنەوەی سەربازگەکان"ـی ڕاگەیاند.

زانیاریی بەدەستهاتوو: سالم خنبەشی، پارێزگاری حەزرەمەوت، جەختی کردەوە، ئۆپەراسیۆنەکە بۆ هەڵگیرساندنی شەڕ نییە، بەڵکو ڕێکارێکی خۆپارێزییە بۆ پاراستنی ئاسایش و ڕێگریکردن لە پشێوی.

ئەم هەنگاوەش دوای ئەوە هات کە ڕەشاد عەلیمی، سەرۆکی ئەنجوومەنی سەرکردایەتیی یەمەن، پارێزگاری حەزرەمەوتی وەک فەرماندەی هێزەکانی "قەڵغانی نیشتمان" ـی لە ناوچەکەدا دەستنیشان کرد.

لەلایەکی دیکەوە: باڵیۆزی سعوودیە لە یەمەن ئاشکرای کرد، عەیدرۆس زوبەیدی، سەرۆکی ئەنجوومەنی ڕاگوزەر، هەوڵەکانی سعوودیەی بۆ هێورکردنەوەی دۆخەکە و کشانەوەی هێزەکانی ئینتقالی لە حەزرەمەوت ڕەتکردووەتەوە.

کاردانەوەکان: حکومەتی یەمەن گەشتە ئاسمانییەکانی بۆ شارەکانی ئەبوزەبی و دوبەی سنووردار کرد، لە بەرامبەریشدا، ئەنجوومەنی ڕاگوزەر وەک پەرچەکردارێک، فەرمانی ڕاگرتنی سەرجەم گەشتەکانی فڕۆکەخانەی نێودەوڵەتیی عەدەنی دەرکرد.