لە شەشەم ڕۆژی خۆپیشاندانەکانی ئێران چی دەگوزەرێت

ئاڤا نیوز

شەش ڕۆژ بەسەر خۆپیشاندانەکان و ناڕەزایەتییەکانی ئێران تێدەپەڕێت، کوژراو بریندار هەیە و ژمارەیەکی زۆری خەڵکیش دەستگیر کراون.

وێنە گەورەکە: بەهۆی دابەزینی بەهای تمەنی ئێرانی بەرامبەر دۆلاری ئەمریکی و گرانی و بێکاری زۆر، ماوەی شەش ڕۆژە خۆپیشاندان لە شاری تاران و زۆربەی شارەکانی دیکەی ئێران بەردەوامە.

بڵاوکراوەی فەرمی: ئاژانسی هەواڵی چالاکانی مافی مرۆڤ لە ئێران، هرانا ڕایگەیاند: بەهۆی خۆپیشاندانەکانی ئەم چەند ڕۆژەی ئێران حەوت کەس کوژراون و 33 کەس بریندارن، نزیکەی 119 کەسیش دەستگیر کراون.

زانیاریی زیاتر: لە ماوەی شەش ڕۆژدا ناڕەزایەتی جەماوەری لە تارانەوە بۆ پارێزگاکانی وەک فارس، ئیسفەهان، چوارمەحاڵ و بەختیاری، هەمەدان، مازەندەران، لوڕستان، کرماشان، خوزستان، ئەلبورز، یەزد، زەنجان و قشم تەشەنەی کرد، لەهەمان کاتدا زانکۆکانیش پەیوەست بوون بەو ناڕەزایەتییانە، جووڵەی قوتابیان لە زانکۆکانی وەک تاران، شەریف، ئەمیرکەبیر، زانست و پیشەسازی، عەلامە تەباتەبایی، بەهەشتی، ئیسفەهان پیشەسازی، یەزد، و زەنجان بڵاو کرایەوە.

کاردانەوەکان: دۆناڵد ترەمپ، سەرۆکی ئەمریکا، بە ئاماژەدان بە ناڕەزایەتییە جەماوەرییەکان لە ئێران، ڕایگەیاند، ئەگەر کۆماری ئیسلامی "تەقە لە خۆپیشاندەرانی ئاشتیخواز بکات"، ئەمریکا بۆ ڕزگارکردنی خەڵک هەنگاو دەنێت.