واشنتن داوای کۆتاییهێنان بە میلیشیاکان دەکات

ئاڤا نیوز

نێردەی سەرۆکی ئەمریکا بۆ عێراق لە یەکەم پەیامی ساڵی 2026دا، داوای نەهێشتنی میلیشیاکان و چەکدانانیان تاوەکو کۆتایی ئەمساڵ دەکات بۆ ئەوەی سەروەریی و ئارامی بۆ عێراق بگەڕێتەوە.

وێنە گەورەکە: مارک ساڤایا، نێردەی سەرۆکی ئەمریکا ڕایگەیاند، واشنتن لە 18 بواری جیاوازدا کار لەگەڵ حکومەتی عێراق دەکات بۆ بنبڕکردنی گەندەڵی، قاچاخچێتی و گرووپە چەکدارەکان. ساڤایا وتی: "کاتی ئەوانەی خراپەکارییان بڵاوکردووەتەوە تەواوبوو، ئێستا کاتی عێراقییەکان و شەکانەوەی ئاڵای عێراقە". لە بەرامبەردا محەممەد کازم ئالسادق، باڵیۆزی ئێران لە بەغدا وتی: "حەشدی شەعبی شانازییە و ئەرکە پشتیوانیی ئەم هێزە بکەین و بەهێزتری بکەین".

زانیاریی زیاتر: پلانەکەی ئەمریکا بۆ ساڵی 2026 بوارەکانی سپیکردنەوەی پارە، بێکاری، نادادپەروەری و دەستوەردانی دەرەکی دەگرێتەوە. ئەم ململانێیە لە کاتێکدایە کە چاوەڕێ دەکرێت چارەسەری بابەتی چەکی دەرەوەی دەوڵەت و دۆسیەی ئابووری، دوو لە سەرەکیترین کارەکانی سەر مێزی سەرۆکوەزیرانی عێراق بن، بەهۆی کاریگەرییان لەسەر گوزەرانی هاووڵاتیان. هاوکات باڵیۆزی ئێران داوای چوونە دەرەوەی تەواوی هێزە بیانییەکانی لە عێراق کرد.

باکگراوند: حەشدی شەعبی هاوپەیمانیی زیاتر لە 70 گرووپی چەکدارییە و لەژێر چەتری عێراقدایە، بەڵام ئەمریکا هەمیشە وەک هێزێکی سەر بە ئێران ناویان دەبات و داوای چەککردن یان تێکەڵکردنیان بە دامەزراوەکانی دەوڵەت دەکات.