قاڵیباف بۆ ترەمپ: هێزەکانتان دەبنە ئامانجمان

ئاڤا نیوز

محەمەد باقر قاڵیباف، سەرۆکی پەرلەمانی ئێران هۆشداریی دایە ئەمریکا کە سەرجەم بنکە و هێزەکانیان لە ناوچەکەدا دەبنە "ئامانجی ڕەوا"، ئەمەش وەک وەڵامێک بۆ لێدوانەکانی دۆناڵد ترەمپ سەبارەت بە خۆپیشاندانەکانی ناوخۆی وڵاتەکە.

وێنە گەورەکە: ئەم لێدوانە ئاستی گرژییەکانی نێوان تاران و واشنتن دەباتە قۆناغێکی نوێ؛ ئێران دەیەوێت لە ڕێگەی هەڕەشەی سەربازییەوە، ڕێگری لە هەر جۆرە دەستوەردانێکی ئەمریکا یان پاڵپشتییەکی واشنتن بۆ خۆپیشاندەرانی ناوخۆی وڵاتەکەی بکات.

لێدوانی فەرمی: قاڵیباف ڕایگەیاند، لە کاردانەوەی هەر "سەرکێشییەکی ئەمریکا"، هەموو ناوەند و هێزەکانیان لە سەرانسەری ناوچەکەدا دەکەنە ئامانج.

- سەرۆکی پەرلەمانی ئێران، ترەمپی بە "سەرۆکێکی بێڕێز" ناوبرد و هۆشداریی پێدا کە گەلی ئێران دوژمنی لەو بەهێزترشی تێکشکاندووە.

-  قاڵیباف جەختی کردەوە کە ڕیزی خۆپیشاندەرانی ناڕازی لە "بەکرێگیراوانی بیانی" جیا دەکەنەوە.

باکگراوند: ئەم توندبوونەوەیەی زمانی بەرپرسانی ئێران دوای ئەوە دێت کە دۆناڵد ترەمپ، هۆشداریی دایە بەرپرسانی کۆماری ئیسلامی سەبارەت بە سەرکوتکردنی خۆپیشاندەران و ڕایگەیاندبوو کە جیهان چاودێریی ڕەفتارەکانیان دەکات.