مەکتەب سیاسی پارتی بۆ تاوتوێکردنی چەند پرسێک کۆدەبێتەوە

ئاڤا نیوز

مەکتەبی سیاسیی پارتی سبەی شەممە (3-1-2026) بە سەرپەرشتیی سەرۆک بارزانی کۆدەبێتەوە، بۆ یەکلاکردنەوەی کاندیدی سەرۆککۆمار و پرسی پێکهێنانی حکومەت لە هەولێر و بەغدا.

بۆچی گرنگە: ئەم کۆبوونەوەیە نەخشەڕێگەی پارتی بۆ دانوستانەکانی داهاتوو لەگەڵ لایەنە عێراقی و کوردستانییەکان دیاری دەکات؛ بەتایبەت دوای هەڵبژاردنی دەستەی سەرۆکایەتیی پەرلەمانی عێراق، ئێستا پرسی پۆستی سەرۆککۆمار گەرمترین مەلەفی سیاسییە.

زانیاریی بەدەستهاتوو: سەرچاوەیەک لە پارتی دیموکراتی کوردستان بە ئاڤای ڕاگەیاند، کۆبوونەوەکە بە ئامادەبوونی جێگرانی سەرۆک دەبێت و ئەم تەوەرانە لەخۆ دەگرێت:

- پۆستی سەرۆککۆمار: دیاریکردنی کاندیدی فەرمیی کورد بۆ ئەم پۆستە لە بەغدا.

- پێکهێنانی حکومەت: تاوتوێکردنی هەنگاوە کردەیییەکان بۆ پێکهێنانی کابینەی نوێی حکومەتی هەرێمی کوردستان و حکومەتی فیدراڵ.

- سەرۆکایەتیی پەرلەمان: هەڵسەنگاندن بۆ پرۆسەی هەڵبژاردنی دەستەی سەرۆکایەتیی پەرلەمانی عێراق کە لە چەند ڕۆژی ڕابردوودا بەڕێوەچوو.

باکگراوند: ئەم جوڵە سیاسییەی پارتی لە کاتێکدایە کە عێراق و ناوچەکە لەبەردەم گۆڕانکاریی نوێدان. یەکلاکردنەوەی کاندیدی سەرۆککۆمار لە نێوان لایەنە کوردییەکان (بەتایبەت پارتی و یەکێتی) هەمیشە خاڵی یەکلاکەرەوە بووە بۆ چوونە ناو قۆناغی پێکهێنانی حکومەت لە بەغدا.