ئێران وەڵامی هەڕەشەکانی ترەمپ دەداتەوە

ئاڤا نیوز

دوای ئەوەی دۆناڵد ترەمپ، سەرۆکی ئەمریکا پەیامێکی لەبارەی خۆپیشاندەرانەوە ئاراستەی ئێران کرد، بەرپرسانی باڵای ئەو وڵاتە بە فەرمی وەڵامیان دایەوە.

چیرۆکی سەرەکی: دۆناڵد ترەمپ، سەرۆکی ئەمریکا، هۆشدارییەکی تووندی ئاراستەی تاران کرد و ڕایگەیاند، ئەگەر دەسەڵاتدارانی ئێران دەست بکەن بە کوشتنی خۆپیشاندەران، ئەوا وڵاتەکەی تەواو ئامادەیە بۆ وەڵامدانەوە.

بڵاوکراوەی فەرمی: عەلی شەمخانی، سکرتێری پێشووی ئەنجوومەنی باڵای ئاسایشی نەتەوەیی ئێران لە تۆری ئێکس لە وەڵامی هەڕەشەکانی ترەمپ نوسیویەتی: "گەلی ئێران ئەزموونی ڕزگارکردنی ئەمریکییەکان بە باشی دەزانێت، لە عێراق و ئەفغانستانەوە تا غەززە."

هەر دەستێکی بە بیانوو لە ئاسایشی ئێران نزیک ببێتەوە، پێش ئەوەی بگات، دەستی دەبڕدرێت و وەڵامێکی پەشیمانانە وەردەگرێت.

لەلایەکی دیکەوە: عەلی لاریجانی، سکرتێری ئەنجوومەنی باڵای ئاسایشی نەتەوەیی ئێران وەڵامی ترەمپی دایەوە و ڕایگەیاند: بە هەڵوێستی بەرپرسانی ئیسرائیل و ترەمپ، پاشخانی ڕووداوەکە ڕوون و ئاشکرا بووە، ئێمە هەڵوێستەکانی خۆپیشاندەران لەگەڵ تێکدەران جیادەکەینەوە و پێویستە ترەمپ بزانێت دەستوەردانی ئەمریکا لەم پرسە ناوخۆییەدا یەکسانە بە پەکخستنی تەواوی ناوچەکە و لەناوبردنی بەرژەوەندییەکانی ئەمریکا.

ئاماژەی بەوەشکرد: پێویستە گەلی ئەمریکا بزانێت کە ترەمپ دەستی بەم سەرکێشییە کردووە بۆیە ئاگاداری سەربازەکانتان بن.