چوارچێوەی هەماهەنگی داوا دەکات پشکی ئاوی عێراق لەگەڵ وڵاتانی دراوسێ گەرەنتی بکرێت

ئاڤا نیوز

چوارچێوەی هەماهەنگی شیعەکان کۆبووەوە و ڕێککەوتنی ئاوی نێوان عێراق و تورکیای تاوتوێکرد، داواشیکرد حکومەت ڕوانگەیەک بۆ گەرەنتیکردنی بەردەوامی دەستەبەرکردنی ئاو و سەروەری نیشتیمانی دابڕێژێت.

وێنە گەورەکە: ڕۆژی 2ـی ئەم مانگە بە سەرپەرشتی محەممەد شیاع سوودانی، سەرۆکوەزیرانی عێراق. هەریەکە لە د. فوئاد حوسێن، وەزیری دەرەوەی عێراق و هاکان فیدان وەزیری دەرەوەی تورکیا واژۆیان لەسەر ڕێککەوتنی بەڕێوەبردنی سەرچاوەکانی ئاو لەنێوان هەردوو وڵاتدا کرد، ئەوەش بە هەوڵێکی نوێی بەغدا بۆ چارەسەری قەیرانی ئاو لە دوورمەودا دادەنرێت.

ڕاگەیێنراوی فەرمی: چوارچێوەی هەماهەنگی ئەمڕۆ دووشەممە لە نووسینگەی نوری مالیکی، سەرۆکی هاوپەیمانی دەوڵەتی یاسا کۆبووەوە و لە ڕاگەیێنراوێکدا ئاماژە بەوەکراوە، لە کۆبوونەوەکەدا ڕێککەوتنی ئاوی نێوان عێراق و تورکیا تاوتوێکراوە و جەخت لە پاراستنی پشکی ئاوی عێراق و گرتنەبەری ڕوانگەیەک بۆ گەرەنتی بەردەوامی دەستەبەرکردنی ئاو و سەروەری نیشتیمانی کرایەوە.

ئەوەشی خستووەتەڕوو، پێزانینیان بۆ هەوڵەکانەکانی پەرلەمان و حکومەت هەیە بۆ فراوانکردنی کارەکانیان و باشترکردنی خزمەتگوزارییەکان، هاوکات ستایشی ڕۆڵی بەرپرسیارانەی دەسەڵاتی دادوەری دەکەن بۆ پاراستنی دادپەروەریی و سەروەری یاسا، جەختیش لە پشتیوانی سەربەخۆیی دامەزراوەی دادوەری دەکاتەوە.