پارێزەرێکی دەمیرتاش بۆ ئاڤا: بە ئەگەری زۆرەوە لەماوەی هەفتەیەکدا دەمیرتاش ئازاد دەکرێت

ئاڤا نیوز

پارێزەرێکی سەڵا‌‌حەددین دەمیرتاش ئاماژە بەوە دەدات ئەگەری زۆرە تاوەکو ڕۆژی سێشەممە دەمیرتاش ئازاد بکرێت، هاوکات یەکەمجاریشە دەوڵەت باخچەلی کە حیزبەکەی هاوپەیمانی ئاک پارتیی دەسەڵاتدارە، گڵۆپی سەوز بۆ ئەم بابەتە هەڵدەکات.

وێنە گەورەکە: لە کاتێکدا دوێنێ دادگای مافی مرۆڤی ئەوروپا داواکارییەکەی وەزارەتی دادی تورکیای ڕەت کردەوە کە تانەی دابوو لە بڕیاری دادگاکە بۆ ئازادکردنی سەڵا‌حەددین دەمیرتاش، ئەمڕۆ باخچەلی ڕایگەیاند: ئازادکردنی دەمیرتاش بەخێر دەگەڕێت بۆ تورکیا. کەمێک لەمەوبەریش تیمی پارێزەرانی دەمیرتاش داواکارییان پێشکەشی دادگای تێهەڵچوونەوە کرد بۆ ئەوەی دەمیرتاش ئازاد بکرێت.

زانیاریی تایبەت: هادی جین، یەکێک لە ئەندامانی تیمی پارێزەرانی سەڵاحەددین دەمیرتاش بۆ ئاڤا میدیا وتی: پێشتریش دادگای مافی مرۆڤی ئەوروپا بڕیاری لەم جۆرەی داوە، بەڵام تورکیا پابەند نەبووە پێیانەوە، جیاوازی ئەمجارە لە جارەکانی دیکە ئەوەیە، ئەمڕۆ باخچەلییش گڵۆپی سەوزی بۆ ئازادکردنی دەمیرتاش هەڵکرد. ئەگەر ئەمجارە تورکیا پابەند نەبێت بە بڕیارەکەی دادگای مافی مرۆڤی ئەوروپا لە لایەکەوە ئاستەنگی گەورە لەبەردەم پرۆسەی ئاشتی دروست دەبێت و گەلی کورد لێی دەکەوێتە گومان، لەلایەکی دیکەیشەوە کێشەی گەورە بۆ حکومەتی هاوپەیمانییەکەی ئەردۆغان دروست دەکات. هەرچەند دڵنیا نین، بەڵام ئەگەری زۆرە دەمیرتاش ئازاد دەکرێت.

بە تەنیشت ئەم بابەتەوە: ئەم پارێزەرەی دەمیرتاش ئاماژە بەوە دەدات داواکارییەکەی ئەمڕۆ بۆ ئازادکردنی دەمیرتاش پێشکەشی دادگای تێهەڵچوونەوە کراوە و بە ئەگەری زۆرە تاکوو ڕۆژی هەینی یان سەرەتای هەفتەی داهاتوو بڕیار لەسەر داواکارییەکە دەدرێت و دەڵێت: هیوادارین تاوەکو ڕۆژی دووشەممە یان سێشەممە دەمیرتاش ئازاد بکرێت و کۆتایی بهێنرێت بە نۆ ساڵ بەسەر بە بارمتەگرتنیدا. دەمیرتاش لەبەر ئەوە نەخراوەتە زیندان تاوانی کردووە، خراوەتە زیندان بۆ ئەوەی تۆمەتی ئەنجامدانی تاوانی بۆ هەڵببەسترێت. 

ئەوەی پێویستە بیزانیت: ئەمڕۆ نۆ ساڵی تەواو بەسەر زیندانیکردنی سەڵاحەددین دەمیرتاشی تەمەن 51 ساڵدا تێدەپەڕێت کە بە تۆمەتی هاندانی خەڵک بۆ ڕژانە سەر شەقام لەکاتی گەمارۆدانی کۆبانێ لەلایەن داعش بە تێکڕایی بە 42 ساڵ زیندانیکردن سزا دراوە. 

لە لایەکی دیکەوە: هەرچەند بڕیارەکەی دادگای مافی مرۆڤی ئەوروپا لە ڕووی یاساییەوە تورکیا پابەند دەکات بە ئازادکردنی دەمیرتاش، بەڵام پێشتریش هەمان دادگا بڕیاری لەم جۆرەی لەسەر دەمیرتاش داوە، بەڵام ئەوکات ڕەجەب تەیب ئەردۆغان، سەرۆککۆماری تورکیا و بەرپرسانی باڵای تورکیا ڕەتیان کردەوە دان بەو بڕیارانەدا بنێن و پابەندبن پێیانەوە.