موقتەدا سەدر بۆ لایەنگرانی: تا هەڵبژاردن کۆتایی دێت خۆپیشاندان و ناڕەزاییەکانتان ڕابگرن

ئاڤا نیوز

ڕێبەری ڕەوتی سەدر، داوا لە لایەنگرانی دەکات "خۆپیشاندانی ناڕەزایی ڕابگرن و نەچنە سەر شەقامەکان تاوەکو هەڵبژاردن کۆتایی دێت".

 

وێنە گەورەکە: بڕیارە سێشەممەی داهاتوو 11ی تشرینی دووەم هەڵبژاردنی خولی شەشەمی پەرلەمانی عێراق بەڕێوەبچێت. ڕەوتی نیشتمانیی شیعە بە ڕابەرایەتی موقتەدا سەدر بڕیاریداوە بایکۆتی هەڵبژاردن بکەن.

 

بڵاوکراوەی فەرمی: موقتەدا سەدر، ڕێبەری ڕەوتی نیشتمانیی شیعە لە وەڵامی شوێنکەوتوو و لایەنگرانی دەڵێت: هیچ خۆپیشاندانێک ئەنجام نەدەن، بەتایبەتی ئەوانەی "پشتگیریی چاکسازی" دەکەن، تاوەکو هەڵبژاردنەکان کۆتایی دێت. ناوبراو جەختی لەسەر ئەوە کردووەتەوە کە "پێویست ناکات هیچ خۆپیشاندانێک بکرێت".

 

بەتەنیشت ئەو بابەتەوە: پێشتریش ڕێبەری ڕەوتی نیشتمانیی شیعە، لە ڕوونکردنەوەیەکدا لەبارەی بوونی پیلانێک بۆ تێکدانی ناوەندەکانی دەنگدان، سووتاندنی سندووقەکانی هەڵبژاردن و تێکدانی ئاسایش و سەقامگیریی ڕۆژی هەڵبژاردنی پەرلەمانی عێراق ڕایگەیاندبوو، ڕەوتەکەیان هیچ پەیوەندییەکی بە پلانێکەوە نییە بۆ تێکدانی پڕۆسەی هەڵبژاردن و سەدر گوتبووی: "هەر کەسێک ئەو کارە بکات، لە ئێمە نییە."