سەرۆک بارزانی: بە خودا و پێشمەرگە و ئیرادەی گەلەکەم پشت ئەستوورم

ئاڤا نیوز

 

سەرۆک بارزانی لە نوێترین دیداری ڕۆژنامەوانیدا دەڵێ، هەرچەندە لە چەند ساڵی ڕابردوو لەڕێگەی هێزی سەربازیی و دادگاوە هەوڵی کۆتاییهێنان بە قەوارەی هەرێمی کوردستان دراوە، بەڵام "کورد چۆکی دانەداوە"، دەشڵێ، بۆ پاراستنی کوردستانیش "هەمیشە  بە خودا و هێزی پێشمەرگە و ئیرادەی گەلەکەم پشت ئەستوورم".

 

وێنە گەورەکە: بۆ هەڵبژاردنە پەرلەمانییەکەی عێراق کە بڕیارە سێشەممەی داهاتوو بکرێت، لیستی پارتی دیموکراتی کوردستان بە ژمارە 275 بەشدارە و چاوی لە بەدەستهێنانی سەروی ملیۆنێک دەنگە، حیزبەکە بۆ ئەم هەڵبژاردنە دروشمی "هاوبەشی، هاوسەنگی و سازان" بەرزکردووەتەوە و جەخت لە پاراستن و بەهێزکردنی قەوارەی هەرێمی کوردستان و بەدیهێنانی مافە دەستوورییەکانی کورد دەکاتەوە.

 

لێدوانی فەرمی: سەرۆک بارزانی لە چاوپێکەوتنێکدا کە کەناڵی شەمس لەگەڵیدا ئەنجامی داوە و  کاتژمێر 9:00ی ئەمشەو بە کاتی هەولێر پەخش دەکرێت، ڕایگەیاندووە، بۆ هەڵبژاردنەکەی سێشەممەی داهاتوو، مەحاڵە "ئەمجارە قبووڵی بکەین یاری بە دەنگێکیش بکرێت و ئەگەر ساختەریش بکرێت ئێمە پێی دەزانین".

 

وتیشی، هەندێک لایەن بە هەموو شێوەیەک هەوڵی کۆتاییهێنان بە قەوارەی هەرێمی کوردستانیان دا، بەڵام گەلی کورد بەهیچ شێوەیەک چۆک دانادات، "ئێمەش داوای هاوبەشی، هاوسەنگی و سازان دەکەین، دەستووریشمان هەیە با دەستوور ناوبژیوان بێت".

 

لەبارەی دادگای فیدڕاڵیش، سەرۆک بارزانی ئەوەی خستەڕوو، ئەم دادگایە بە سیاسی کراوە و ئەوانەی دەیانەوێت پیلانگێڕی دژی کوردستان بکەن، باشترە بۆیان دووجار بیربکەنەوە، چونکە پێشتر نەیارەکانمان "بە حەشد و بەسەرپەرشتی ئێرانی و بە تانکی ئەمریکی هێرشیانکردەسەرمان، بەڵام ئەمریکا هیچ هەنگاوێکی بۆ هاوکارییکردنمان نەنا، من بە خوا و  هێزی پێشمەرگە و ئیرادەی گەلەکەم پەشت ئەستوورم".

 

لەلایەکی دیکە؛ لەبارەی کەرکووکیش، سەرۆک بارزانی جەختی لە جێبەجێکردنی سەرجەم بڕگەکانی ماددەی 140 دەستووری عێراق کردەوە و ڕایگەیاند، پرسی کەرکووک بە هەر سێ قۆناغەکەی ئەم ماددەیە چارەسەر دەبێت کە ئەوانیش بریتین لە ئاساییکردنەوە، سەرژمێریی و ڕاپرسی.

 

پەیوەست هەڵبژاردنی پەرلەمانی عێراقیش، سەرۆک بارزانی باسی لەوەکرد، ئامانج  سەرەکییان لە هەڵبژاردنەکەی 11ـی 11 نیشاندانی هێزی پارتییە، داواشی لە سەرکردەکانی عێراق کرد "بیر لە داهاتووی وڵات" بکەنەوە.