سەرۆک بارزانی: پێویستە پشت بە خۆمان ببەستین و چاومان لە دەستی کەس نەبێت

ئاڤا نیوز

سەرۆک بارزانی لەگەڵ بەرپرس و کادیرانی لقی شەشی ئەوروپای پارتی کۆبووەوە و خۆشحاڵی خۆی دەربڕی بە گەڕانەوەیان لە وڵاتانی ئەوروپاوە بۆ سەرخستنی لیستی 275ـی پارتی و وتی، "پێویستە هەموومان پشت بە خۆمان ببەستین و چاومان لە دەستی کەس نەبێت".

وێنە گەورەکە: بانگەشەی هەڵبژاردن تەنیا دوو ڕۆژی ماوە، تا دێ پاڵپشتی بۆ لیستی پارتی دیموکراتی کوردستان فراوانتر دەبێ و لەم چوارچێوەیە ژمارەیەکی زۆری کادیر و بەرپرسانی پارتی لە ئەوروپاوە بۆ پاڵپشتی گەڕاونەتەوە کوردستان.

لێدوانی فەرمی: سەرۆک مەسعود بارزانی، ڕایگەیاند، پەیڕەونەکردنی بڕگەکانی دەستوور بوونەتە هۆکاری سەرهەڵدانی دەیان کێشە لە نێوان هەرێمی کوردستان و بەغدا. جێبەجێکردنی بڕگەکانی دەستوور هۆکاری سەرەکی سەقامگیری و ئاوەدانی و پێکەوەژیانی هەموو عێراقە.

زانیاریی زیاتر: لەبارەی زوڵم و زۆرداریی ڕژێمەکانی عێراق سەرۆک بارزانی دەڵێت: دوای ئەو هەموو زوڵم و زۆرداری و ماڵوێرانییەی کە بەسەر گەلی کوردستاندا هات، ئێستا هەرێمی کوردستان خاوەنی قەوارەیەکی سیاسییە و لەم چوارچێوەیەدا وێڕای هەبوونی ئاستەنگ و ڕێگری بەردەوام، هەرێمی کوردستان لە هەوڵێکی چڕدایە بۆ پێشخستن و ئاوەدانکردنەوەی شار و شارۆچکەکانی بەبێ جیاوازی و پڕۆژەی زۆر گەورەش ئەنجامدراون پشکی شێری ئەو پرۆژانەش بە توانای دەستی ناوخۆیی هاتوونەتە ئاراوە.

سەرۆک بارزانی لەگەڵ بەرپرس و کادیرانی لقی شەش ئەمانەشی وت:

٠ چۆن لە رابردوودا پێشمەرگە ئاسا تێکۆشاون لە ئێستاشدا بەردەوام بن دژی ئەو هەوڵانەی کە بۆ خەڵک و حکومەت و هەرێمی کوردستان بە گشتی دروستدەکرێن.

٠ دوژمنان بە پلانی جۆراوجۆر هەوڵی تێکدانی ئەو ئەزموونەی هەرێمی کوردستان دەدەن، بە تایبەت لە ڕێگەی بڵاوکردنەوەی ماددەی هۆشبەر لەناو کۆمەڵگادا.

٠ پێویستە هەموومان پشت بە خۆمان ببەستین و چاومان لە دەستی کەس نەبێت. لە مێژوودا دیارە چ کاتێک کوردستان کەوتبێتە دۆخێکی مەترسیدار و بەر هێرشی نەیاران، هەر پێشمەرگە بووە بە تەنیا بەرگری لە خاک و کەڕامەتی کوردستانییان کردووە.

٠ ئێمە پشتمان بە خودا و گەلی خۆمان بەستووە، بۆیەش لە هیچ دۆخێک و لە ژێر هیچ گوشارێک سازش لەسەر مافە ڕەواکانی گەلی خۆمان ناکەین.