نزیکەی 26 هەزار ئاوارە لە سنووری پارێزگای دهۆک دەنگ دەدەن

ئاڤا نیوز

پرۆسەی دەنگدانی تایبەت لەسەرجەم ناوچەکانی عێراق بەردەوامە، زیاتر لە 26 هەزار ئاوارە لە هەرێمی کوردستان مافی دەنگدانیان هەیە، بەشێکی زۆریان دەکەونە سنووری پارێزگای دهۆک.

وێنە گەورەکە: ساڵی 2014 ئەو کاتەی چەکدارانی داعش شنگال و گوندەکانی دەورووبەریان داگیر کرد هەزاران خێزانی ئێزدی ڕوویان لە شارەکانی هەرێمی کوردستان کرد، بەشێکیان گەڕانەوە و بەشێکی دیکەیان ماون زۆرینەیان لە کەمپەکانی سنووری پارێزگای دهۆک نیشتەجێن.

لێدوانی فەرمی: خالد عەباس، بەرپرسی ئۆفیسی دهۆکی کۆمیسیۆنی هەڵبژاردنەکانی عێراق بە ئاڤای گوت، "جگە لە پێشمەرگە و هێزە ئەمنییەکان، ڕۆژی یەکشەممە نزیکەی 26 هەزار ئاوارە لە 23 بنکەی هەڵبژاردن مافی دەنگدانیان هەیە و دەتوانن لە پرۆسەی دەنگدانی تایبەت دەنگ بدەن."

ئەوەی پێویستە بیزانیت: 82 هەزار و 416 دەنگدەر لەسنووری پارێزگای دهۆک دەتوانن لە پرۆسەی دەنگدانی تایبەت دەنگ بدەن و 25 هەزار و 986 دەنگدەر ئاوارەکانی شنگالن، لە 23 بنکە دەنگ دەدەن.

ئەمەش بزانە: جگە لە دهۆک لە پرۆسەی دەنگدانی تایبەت لە هەولێر و سلێمانیش ئاوارەکان دەنگ دەدەن لە هەولێر 547 دەنگدەر و پێنج دەنگدەریش لە سلێمانی.