شارەوانی هەولێر سکاڵا لە دژی کاندید و لایەنە سەرپێچیکارەکان تۆمار دەکات

ئاڤا نیوز

دوای هەڵبژاردنی گشتیی ئەنجوومەنی نوێنەرانی عێراق، پڕۆسەی کۆکردنەوەی فلێکس و وێنەی لایەنە سیاسییەکان و کاندیدەکانیان دەست پێ دەکات، سەرۆکی شارەوانی هەولێریش لەوبارەیەوە دەڵێت: 'پێشێلکاری زۆر کراوە و سکاڵا لە کۆمیسیۆن تۆمار دەکەین'.

وێنە گەورەکە: لەلایەن کۆمیسیۆنی باڵای سەربەخۆی هەڵبژاردنەکانی عێراق، ماوەی مانگێک بۆ کۆکردنەوەی فلێکس و وێنەی کاندید و لیستی لایەنە سیاسییەکان دانراوە، دەبێت لەو ماوەیەدا سەرجەمیان پابەندی بڕیارەکەبن، ئەگەر پابەندنەبن ئەوا لێپێچینەوەی یاسایی و پێبژاردنیان بۆ دەکرێت. 

لێدوانی فەرمی: کارزان هادی، سەرۆکی شارەوانی هەولێر بە ئاڤای ڕاگەیاند: ئێمە چاوەڕێی تەواوبوونی ئەم مانگە ناکەین، بەڵکو هەڵدەستین بە لابردنی فلێکس و وێنەکان، داوا لە سەرجەم کاندید و لایەنە سیاسییەکان دەکەین لەم کارەدا هاوکارمان بن.

لەلایەکی دیکەوە: سەرۆکی شارەوانی هەولێر دەڵێت: ئەو کاندید و لایەنە سیاسییانەی پابەندی ڕێنماییەکان نەبوون و سەرپێچیان کردووە، بە داتا ناو و زانیارییەکانیان کۆدەکەینەوە و بەنووسراوی فەرمی بۆ کۆمیسیۆنی دەنێرین، بۆ ئەوەی سزایان بدات، سزاکانیش پێبژاردنە لەگەڵ تێچووی هەڵگرتنەوەی فلێکس و وێنەکانیان.

زانیاریی زیاتر: سەرۆکایەتی شارەوانی هەولێر بەهۆی سەرپێچی کاندید و لایەنە سیاسییەکان و پابەندنەبوونیان بە ڕێنماییەکان، سکاڵای لەسەر چەندین کاندید و لایەنی سیاسیی تۆمار کردووە و لەلایەن تیمەکانیانەوە کاری لەسەر دەکرێت.