وەزارەتی گواستنەوە و گەیاندن لەبارەی ڕاگرتنی ئینتەرنێت لە ڕۆژی دەنگدان ڕوونکردنەوە دەدات

ئاڤا نیوز

وەزارەتی گواستنەوە و گەیاندنی حکومەتی هەرێمی کوردستان، لەبارەی بوونی خزمەتگوزاریی ئینتەرنێت لە ڕۆژانی دەنگدانی گشتیی دڵنیایی دەداتە هاووڵاتییان.

چیرۆکی سەرەکی: بڕیارە سبەی سێشەممە پڕۆسەی دەنگدانی گشتیی بۆ خولی شەشەمی پەرلەمانی عێراق لە سەرانسەری وڵات بەڕێوەبچێت، بۆ ئەو مەبەستەش ئامادەکارییەکان تەواو کراون و خزمەتگوزارییە گشتییەکانیش بەردەم دەبن.

لێدوانی فەرمی: دیلان ڕەشاد، وتەبێژی وەزارەتی گواستنەوە و گەیاندنی حکومەتی هەرێمی کوردستان بە ئاڤا میدیای ڕاگەیاند: هیچ بڕیارێکی فەرمی بۆ ڕاگرتنی ئینتەرنێت لە ڕۆژانی دەنگدان نییە، خزمەتگوزارییەکە لە سەرجەم شارەکانی هەرێمی کوردستان بەردەوام دەبێت و هاووڵاتییان دەتوانن لێی سوودمەندبن.

لەلایەکی دیکەوە: ڕۆژی 10-11-2025، وەزارەتی پەیوەندییەکانی حکومەتی عێراق ڕایگەیاند: کۆمپانیای پەیوەندییەکان و زانیاریی سەر بە وەزارەتی پەیوەندیی عێراق ئامادەیی تەواوی خۆی بۆ دەستەبەرکردنی خزمەتگوزاریی ئینتەرنێت لە ڕۆژی دەنگدانی گشتی نیشانداوە، سەرجەم کۆمپانیا دابینکارەکان چوونەتە قۆناغی ئامادەباشییەوە بۆ دڵنیابوون لە بەردەوامیی خزمەتگوزارییەکان لە هەموو پارێزگاکان.

زانیاریی زیاتر: بۆ ڕووبەڕووبوونەوەی هەر گرفتێک یان هێرشی ئەلیکترۆنی، وەزارەتی پەیوەندییەکانی عێراق تیمێکی تەکنیکی پێکهێناوە و بەردەوام چاودێری دۆخی خزمەتگوزاریی ئینتەرنێت دەکەن.