وەزارەتی خوێندنی باڵا زەمالەی خوێندن لە وڵاتی ڕووسیا ڕادەگەیێنێت

ئاڤا نیوز

وەزارەتی خوێندنی باڵا و توێژینەوەی زانستیی هەرێمی کوردستان زەمالەی خوێندنی (بەکالۆریۆس، ماستەر و دکتۆرا) بۆ ساڵی خوێندنی 2026 – 2027) لە وڵاتی ڕووسیا ڕادەگەیێنێت. یەکێک لە مەرجەکانی وەرگرتن ئەوەیە پێشکەشکار لە هیچ دامودەزگایەکی حکومەتی هەرێمی کوردستان دانەمەزرابێت.

 

لێدوانی فەرمی: عەباس ئەکرەم، وتەبێژی وەزارەتی خوێندنی باڵا بە ئاڤای ڕاگەیاند، هەر کەسێک ئارەزوی خوێندنی لە زانکۆکانی وڵاتی ڕووسیا هەبێت، بەپێی ئەم مەرج و تێبینییانەی کە لە خوارەوە ئاماژەی پێکراوە، دەتوانێت داواکاری لە ڕێگەی لینکی هاوپێچ پێشکەش بە سەرچاوەی زەمالەکە بکات:

 

داواش کات 15-1-2026، دەبێت بۆ پێشکەشکردن لە ڕێگەی ماڵپەڕی سەرەوە و ئەپلۆدکردنی فایلەکان (وەرگێردراوی سەر زمانی ڕووسی و تەسدیقکردنی لە کونسوڵخانە).

 

زانیاریی زیاتر: بۆ ئەوەی پێشکەشکارانی هەرێمی کوردستان جیابکرێنەوە لەگەڵ ناوچەکانی دیکەی عێراق، پێویستە پێشکەشکار لە کاتی تۆمارکردن و پێشکەشکردن کلیکی ئەم دەستەواژەیە (Iraq Kurdish Autonomous Region) بکات. ژمارەی تۆمارکردن لە هەرێمی کوردستان بەم ژمارەیە (IRI- 10000/26) دەست پێدەکات.

 

ئەوەی پیویستە بیزانیت: مەرجەکانى پێشکەشکردن بۆ زەمالەی خوێندن بۆ ساڵی 2026 – 2027 لە وڵاتی ڕووسیا بەمشێوەیە:

1.  بەکالۆریۆس:

- پێشکەشکار دەبێت هاووڵاتیی هەرێمی کوردستان بێت.
- دەبێت لە هیچ دامودەزگایەکی حکومەتی هەرێمی کوردستان دانەمەزرابێت.
- بۆ ئەو پێشکەشکارانەی کە داواکاری بۆ پسپۆری پزیشکی پێشکەش دەکەن دەبێت کۆنمرەی پۆلی دوانزدەى زانستییان لە (85%) کەمتر نەبێت، بۆ ئەو کەسانەی داواکاری بۆ پسپۆری ددان و دەرمانسازی پێشکەش دەکەن دەبێت کۆنمرەی پۆلی دوانزەى زانستىیان لە (80%) کەمتر نەبێت، ئەو کەسانەشی داواکاری بۆ پسپۆری ئەندازیاری پێشکەش دەکەن دەبێت کۆنمرەی پۆلی دوانزەى زانستىیان لە (75%) کەمتر نەبێت.
- کاندیدی سەرکەوتوو لەلایەن وڵاتی ڕووسیا پشتگیری دارایی دەکرێت.
-لەبەرئەوەی پێشکەشکردن ڕاستەوخۆ لەڕێگەی ماڵپەڕی زەمالەکەیە، وەزارەتی خوێندنی باڵا هیچ فایلی لەبەردەست نییە تا کاری لەسەر بکات، بۆیە تا دەرچوونی ئەنجامی زەمالەکە بەهیچ شێوەیەک سەردانی وەزارەت مەکەن.
- کاندیدی سەرکەوتوو پێویستە دۆسیەی ئەلیکترۆنی لە وەزارەتی خوێندنی باڵا و توێژینەوەی زانستی پڕ بکاتەوە. 

2. ماستەر:

- پێشکەشکار دەبێت هاووڵاتیی هەرێمی کوردستان بێت.
- پێشکەشکار ئەگەر فەرمانبەر یان مامۆستا بێت لە دامودەزگاکانی هەرێمی کوردستان، ئەوا دەبێت بە لایەنی کەم دوو ساڵ خزمەتی هەبێت لە پاش بە دەستهێنانی دوایین بڕوانامە. 
- پێشکەشکار دەبێت کۆنمرەی بەکالۆریۆسی لە (65%) کەمتر نەبێت.
- داواکار دەبێت لە هەمان بواری خۆی داواکاری بۆ بەرنامەی ماستەر پێشکەش بکات. (واتا بەکالۆریۆس و ماستەرەکەی لە هەمان بوار بێت).
- کاندیدی سەرکەوتوو ئەگەر دامەزراو بێت، ئەوا لەلایەن وەزارەتی پەیوەندیدار تەنها مۆڵەتی خوێندنی پێ دەدرێت واتا بە مووچەی بنەڕەتی و دەرماڵەی جێگیرەکان.
- کاندیدی سەرکەوتوو لەلایەن وڵاتی ڕووسیا پشتگیری دارایی دەکرێت.
- لەبەرئەوەی پێشکەشکردن ڕاستەوخۆ لەڕێگەی ماڵپەڕی زەمالەکەیە، وەزارەتی خوێندنی باڵا هیچ فایلی لەبەردەست نییە تا کاری لەسەر بکات، بۆیە تا دەرچوونی ئەنجامی زەمالەکە بەهیچ شێوەیەک سەردانی وەزارەت مەکەن.
- کاندیدی سەرکەوتوو پێویستە دۆسیەی ئەلیکترۆنی لە وەزارەتی خوێندنی باڵا و توێژینەوەی زانستی پڕبکاتەوە. 

 

3.  دکتۆرا:

- پێشکەشکار دەبێت هاووڵاتیی هەرێمی کوردستان بێت.
- پێشکەشکار ئەگەر فەرمانبەر یان مامۆستا بێت لە دامودەزگاکانی هەرێمی کوردستان، ئەوا دەبێت بە لایەنی کەم دوو ساڵ خزمەتی هەبێت لە پاش بە دەستهێنانی دوایین بروانامە. 
- دەبێت کۆنمرەی ماستەری لە (70%) کەمتر نەبێت.
- داواکار دەبێت لە هەمان بواری خۆی داواکاری بۆ بەرنامەی دکتۆرا پێشکەش بکات. (واتا ماستەر و دکتۆراکەی لە هەمان بوار بێت).
- کاندیدی سەرکەوتوو ئەگەر دامەزراو بێت، ئەوا لەلایەن وەزارەتی پەیوەندیدار تەنها مۆڵەتی خوێندنی پێدەدرێت واتا بە مووچەی بنەڕەتی و دەرماڵەی جێگیرەکان.
- کاندیدی سەرکەوتوو لەلایەن وڵاتی ڕووسیا پشتگیری دارایی دەکرێت.
- لەبەرئەوەی پێشکەشکردن ڕاستەوخۆ لەڕێگەی ماڵپەڕی زەمالەکەیە، وەزارەتی خوێندنی باڵا هیچ فایلی لەبەردەست نییە تا کاری لەسەر بکات.
- کاندیدی سەرکەوتوو پێویستە دۆسیەی ئەلیکترۆنی لە وەزارەتی خوێندنی باڵا و توێژینەوەی زانستی پڕبکاتەوە. 

 

ڕێککەوتنەکە بەمشێوەیە؛ وەزارەتی خوێندنی باڵا وەک تێبینی ئارەزوومەندان ئاگادار دەکاتەوە، هەرکەسێک ئەم مەرج و ڕێنماییانەی سەرەوەی تیایدا بەرجەستە نەبێت، دواجار مۆڵەتی خوێندنی پێنادرێت و بڕوانامەکەی بۆ یەکسان ناکرێت.