مەشهەدانی: ئاستەنگییەکانی بەردەم پێکهێنانی کابینەی نوێ کەمتر بوونەتەوە

ئاڤا نیوز

سەرۆکی پەرلەمانی عێراق دەڵێت، بۆ قۆناغی داهاتوو وڵات پێویستی بە حکومەتێکی بەتوانا و خزمەتگوزاری هەیە، ئاشکراشیکرد کە بەراورد بە ڕابردوو، ئاستەنگییەکانی بەردەم پێکهێنانی کابینەی نوێ کەمتربوونەتەوە و ئومێدەوارە لە ماوەیەکی کورتدا حکومەت پێکبهێنرێت.

وێنە گەورەکە: ئەمڕۆ سێشەممە بەبەشداریی 20 ملیۆن و 63 هەزار و 773 دەنگدەر، پرۆسەی هەڵبژاردن بۆ خولی شەشەمی پەرلەمانی عێراق دەستیپێکرد، هەڵبژاردنەکە دوای 37 ڕۆژ لە بانگەشەیەکی گەرمی لایەنەکان بەڕێوەدەچێت، لەناو سێ پێکهاتەکەشدا 11 لیست و هاوپەیمانی کێبرکێی لەسەر بەدەستهێنانی زۆرترین کورسی دەکەن.

لێدوانی فەرمی: مەحموود مەشهەدانی، سەرۆکی پەرلەمانی عێراق لە وێستگەی دەنگدانی تایبەت بە بەرپرسان لە بەغدا دەنگیدا و ئاماژەی بەوەشکرد، ئومێدەوارە ئەم هەڵبژاردنە ئارامیی و خۆشگوزەرانی زیاتر بۆ وڵات بهێنێت، داواشی لە خەڵک کرد کاندیدی بەتوانا و لێهاتوو هەڵبژێرن، تا پەرلەمانێکی بەتوانا لە وڵاتدا هەبێت و ئەویش متمانە بە حکومەتێکی بەتوانا و خزمەتگوزار بدات.

وتیشی، ئەم قۆناغە قۆناغی بونیادنانەوەی دەوڵەت و دامەزراوەکانە، باوەڕیشی وایە ئاستەنگییەکان بۆ پێکهێنانی کابینەی نوێی حکومەت هەن بەڵام بەراورد بە پێشتر، ئاستەنگییەکان کەمتر بوونەتەوە لەنێوان لایەنەکان، بۆیە بەپێویستی دەزانێت پەلە بکرێت لە هەڵبژاردنی سەرۆکایەتییەکان و پێکهێنانی حکومەتی نوێ لە زووترین کاتدا.