وەزارەتی ناوخۆ: هیچ پێشێلکارییەکی ئەمنی تۆمار نەکراوە و پلانەکە بە باشی بەڕێوەدەچێت

ئاڤا نیوز

وەزارەتی ناوخۆی عێراق ڕایدەگەیێنێت، جێبەجێکردنی پلانی دەنگدانی گشتی بۆ دابینکردنی ئاسایشی بنکەکانی هەڵبژاردن لە سەرانسەری وڵاتدا بەپێی پلانە داڕێژراوەکە بەڕێوەدەچێت و ئاماژە بەوە دەدات "هیچ پێشێلکارییەکی ئەمنی لە سنوورەکانی بەرپرسیارێتیی گشتیدا تۆمار نەکراوە."

چیرۆکی سەرەکی: بە بەشداریی زیاتر لە 20 ملیۆن دەنگدەر بەرەبەیانی ئەمڕۆ سێشەممە پڕۆسەی دەنگدان بۆ خولی شەشەمی پەرلەمانی عێراق لەسەرانسەری وڵات دەستیپێکرد و پرۆسەکە تاوەکو کاتژمێر شەشی ئێوارە بەردەوام دەبێت. 

لێدوانی فەرمی: عەمید میقداد میری، بەڕێوەبەری فەرمانگەی پەیوەندییەکان و ڕاگەیاندن لە وەزارەتی ناوخۆ بە ئاژانسی هەواڵی عێراقی ڕاگەیاند: "دەزگا ئەمنییەکان لە یەکەم کاتژمێرەکانی بەیانییەوە تا ئێستا ڕۆڵێکی نایاب و گەورە دەگێڕن لە جێبەجێکردنی پلانی دەنگدانی گشتی بۆ دابینکردنی ئاسایشی 8,703 بنکەی دەنگدان لە سەرانسەری وڵاتدا." ناوبراو ڕوونیشیکردەوە کە "پلانێک هەیە بۆ پێش، لە کاتی و دوای هەڵبژاردنەکان، بەو پێیەش کارەکان بەپێی پلانە داڕێژراوەکە بەڕێوەدەچن."

لە هەمان کاتدا: میری وتیشی "وەزارەتی ناوخۆ گەورەترین بەشی ئەم پلانەی پێیە، چونکە کۆنترۆڵی بنکەکانی شارەکانی کردووە، جگە لە کۆنترۆڵکردنی چەندین پارێزگا لە ڕووی ئەمنییەوە." ناوبراو دووپاتیکردەوە "هیچ پێشێلکارییەک لە سنوورەکانی بەرپرسیارێتیی گشتیدا تۆمار نەکراوە."

ئەوەی پێویستە بیزانیت: میری ئاماژەی بەوەشکرد کە "هەرکەسێک نەیتوانیوە لە دەنگدانی تایبەت دەنگ بدات، ئەوا ئەمڕۆ لە دەنگدانی گشتیدا دەنگ دەدات، چونکە مۆڵەتی 48 کاتژمێریان پێدراوە."