دەستکەوت و ئەنجامەکانی کۆڕبەندی داڤۆس بۆ هەرێمی کوردستان

 

داڤۆس 2024 کۆتاییهات: ئەمەش ‎دەستکەوت و ئەنجامەکانی بۆ هەرێمی کوردستان:

 

یەکەم: بەڕێز سەرۆکوەزیران کۆنسێپتی بەشداریکردنی هەرێمی کوردستانی لە داڤۆس گۆڕی، بەشێوەیەک کە تەنیا دیدارەکان سیاسی نەبن، لەکاتێکدا کۆڕبەندەکە ئابوورییە. بۆیە ئەمساڵ زیاتر لە 10 وەبەرهێنەر و سەرمایەداری گەورەی کورد لە شارە جیاوازەکان بەشێک بوون لە بەشداربووان.

 

دووەم: ماڵی کوردستان لە داڤۆس لەپاڵ وڵاتانی دیکە کرایەوە و بووە وێستگەیەکی گرنگ بۆ کۆمپانیاکانی کوردستان و کۆمپانیا گەورەکانی جیهان بۆئەوەی گفتوگۆی بازرگانی و بوونیادنان بکەن.

 

سێیەم: ماڵی کوردستان لە داڤۆس بووە سەکۆیەک بۆ پشتیوانیی لە وەبەرهێنان لە کوردستان، پێشاندانی دەرفەتەکان و ئاشناکردنی سەرمایەدارانی بیانی بە کوردستان.

 

چوارەم:  ماڵی کوردستان لە داڤۆس نوێنەرایەتی عێراقیشی دەکرد، چونکە بەشداریکردنی عێراق لە داڤۆس کەمێک تازەیە و  ڕەنگە ساڵی داهاتوو وەک ئێمە بکەن.

 

پێنجەم: لەمەودوا سەرمایەدارانی کوردستان بەشێک دەبن لە بڕیاردەرانی سیاسەتی ئابووری لە کوردستان و سیاسییەکان لەجیاتی ئەوان بڕیار نادەن.

 

شەشەم: خۆشبەختانە چوار گرێبەست و لێکتێگەیشتنی باش لەنێوان کۆمپانیاکانی هەرێمی کوردستان و کۆمپانیا جیهانییەکان کراون، کە تەنیا یەکێکیان دەبێتە هۆی ڕەخساندنی هەلی کار بۆ 1500 گەنجی کوردستان.

 

حەوتەم: لەگەڵ قەتەر نزیکبوونەوەی باش کراوە. سەرۆکوەزیرانی هەرێمی کوردستان و سەرۆکوەزیرانی قەتەر لە داڤۆس رێککەوتوون بەم نزیکانە  شاندێکی وەبەرهێنەرانی قەتەر بێنە هەولێر.

 

هەشتەم: لەگەڵ ئاژانسی وەبەرهێنانی قەتەریش لە ماڵی کوردستان رێککەوتنی سەرەتایی کراوە بۆ پڕۆژەیەکی گەورەی وەبەرهێنان، کە کاریگەری زۆر گەورەی دەبێ بۆ کوردستان و عێراق.

 

نۆیەم: لەگەڵ وەزیری ئابووریی عومان لێکتێگەیشتن کراوە بۆ دەستکردن بە دروستکردنی ئەنجوومەنێکی هاوبەش بۆ پیاوانی کاری هەردوولا.

 

دەیەم: ئەمساڵ دەرفەتێکی گەورەبوو کە جەنابی سەرۆکوەزیران راستەوخۆ سەرکردەکانی جیهان لە تاوانی هێرشی ئێران بۆ سەر هەولێر ئاگاداربکاتەوە و هەڵوێستی تووند بنوێنن.

 

یانزەیەم: ساڵی داهاتوو باشتر بەشدار دەبین و هیچ هێرشێک نامانوەستێنێ لە پشتیوانیی ئاوەدانیی کوردستان و ‎پێشکەوتن.

 

نەیاران دەبێ بزانن ئەو رۆژەی سەرمایەدارێکیان کردینە ئامانج و شەهیدیان کرد، هەر ئەو رۆژە دەیان سەرمایەداری کورد خەریکی پلانی بەرەوپێشبردنی کوردستان بوون لە ‎ماڵی خۆیان لە گەورەترین کۆڕبەندی ئابووریی جیهان لە داڤۆس.