پەیامێکی خێرا لە سەرۆکوەزیرانی کوردستانەوە لەبارەی هەڵبژاردن

ئاڤا نیوز

سەرۆکوەزیران مەسرور بارزانی سوپاسی خەڵکی کوردستان دەکات بۆ بەشداریکردنیان لە پرۆسەی هەڵبژادن. 

چیرۆکی سەرەکی: ئەمڕۆ سێشەممە بە بەشداریی زیاتر لە 20 ملیۆن کەس کە مافی دەنگدانیان هەبوو، پرۆسەی هەڵبژاردن بۆ خولی شەشەمی پەرلەمانی عێراق بەڕێوەچوو. 

پەیامی فەرمی؛ سەرۆکوەزیرانی کوردستان پەیامێکی لەبارەی هەڵبژاردنی پەرلەمانی عێراق بڵاو کردەوە و تیایدا هاتووە: سوپاس بۆ خودای مەزن، پرۆسەی هەڵبژاردنی ئەنجوومەنی نوێنەرنی عێراق بە سەرکەوتوویی کۆتاییهات.

پیرۆزبایی لە خەڵکی عێراق بە گشتی و خەڵکی کوردستان بە تایبەتی دەکەم و سوپاسییان دەکەم کە بەشداریان لەم پرۆسەیەدا کرد و ماف و ئەرکی نیشتمانیی خۆیان جێبەج کرد و نوێنەرەکانیان هەڵبژارد، هەروەها سوپاسی کۆمیسیۆنی باڵای سەربەخۆی هەڵبژاردنەکان و هێزە ئەمنییەکان لە ئاسایش و پۆلیس و پێشمەرگە دەکەم بۆ سەرخستنی پرۆسەی دەنگدان و ڕۆڵی بەرپرسیارانەیان لە پاراستنی ئاسایش و سەلامەتیی بەڕێوەچوونی پرۆسەی هەڵبژاردن. دەستخۆشی لە هەموو بریکار و چاودێرانی بیانی و ناوخۆیی دەکەم بۆ هاوکاری و چاودێریکردنی پرۆسەکە.

هیوادارم بە ئەمانەتەوە، ڕێز لە دەنگی دەنگدەران بگیرێت. هەروەها ئەو نوێنەرانەی متمانەی دەنگدەران بەدەست دەهێنن ، نوێنەری ڕاستەقینەی خەڵک بن و داکۆکی لە مافە دەستوورییەکانی خەڵکی کوردستان و قەوارەی هەرێمی کوردستان و بەرژەوەندی گشت هاوڵاتییانی عێراق بکەن.

 

ئومێدەوارم سەردەمێکی نوێ لە عێراقی فیدراڵ و دیموکرات بۆ بەدیهێنانی هەموو مافە ڕەواکانی گەلەکەمان دەست پێ بکات و ئەنجامی هەڵبژاردن ببێتە هۆی باشتربوونی ژیان و گوزەرانی هاووڵاتیانی عێراق و بەهێزتربوونی پێگەی هەرێمی کوردستان و چارەسەرکردنی بنەڕەتی کێشەکانی نێوان هەرێمی کوردستان و حکومەتی فیدراڵ لەسەر بنەمای دەستوور و ڕێککەوتنەکان و ڕێزگرتن لە قەوارەی دەستووریی هەرێمی کوردستان.