مەسرور بارزانی سەرکەوتنی پارتی لە هەڵبژاردن ڕاگەیاند

ئاڤا نیوز

مەسرور بارزانی سەرکەوتنی پارتی لەم هەڵبژاردنە ڕاگەیاند و پیرۆزبایی لە سەرۆک مەسعود بارزانی دەکات. هاوکات پیرۆزبایش لە نێچیرڤان بارزانی دەکات کە تەحەدای یەک ملیۆن دەنگی ڕاگەیاند و دەنگەکانی پارتی یەک ملیۆنی تێپەڕاند.

پەیامی فەرمی: مەسرور بارزانی، جێگری سەرۆکی پارتی پەیامێکی بڵاوکردەوە و ناوەرۆکی پەیامەکە بەمجۆرەیە: سوپاس بۆ خودای گەورە و بە هەڵوێست و ویستی هاووڵاتییانی بە ئەمەکی کوردستان و ئەندامانی پارتی، دەنگەکانی پارتی دیموکراتی کوردستان لە یەک ملیۆن دەنگ تێپەڕێ و لە ئەنجامی کۆتایی زیاتریش دەبن.

جێگری سەرۆکی پارتی ڕاشیگەیاندووە: پیرۆزبایی لە سەرۆک و ڕابەری گەلەکەمان جەنابی سەرۆک بارزانی دەکەم. پیرۆزبایی لە برای بەڕێز و خۆشەویستم کاک نێچیرڤان دەکەم کە تەحەدای یەک ملیۆنی ڕاگەیاند.

جێگری سەرۆکی پارتی سوپاس و دەستخۆشی لە سەرکردایەتی و ئەندام و لایەنگرانی پارتی دەکات، هاوکات پیرۆزبایی لە هەموو خەڵکی کوردستانیش دەکات. ڕایگەیاندووە، ئەم سەرکەوتنە گەورەیە لە پرۆسەی دیموکراسی و هەموو خەڵکی عێراق پیرۆز بێت. بە گوڕ و تینێکی زیاتر لە خزمەتی هەموو کوردستانیان و نیشتمانمان بەردەوام دەبین و بەرەو وڵاتێکی سەقامگیرتر و ئاوەدانتر.

ئەوەی پێویستە بیزانیت: بەگوێرەی دوایین داتا کە دەست ئاڤا کەوتووە، دەنگەکانی پارتی بێ کۆتاکان تا ئێستا یەک ملیۆن و 24 هەزار و 728 دەنگ بووە.