کادیرێکی پارتی لە سلێمانی دەڕفێنرێت

ئاڤا نیوز

یەکێتیی قوتابییان و لاوان بە ئاڤای ڕایگەیاند، درەنگانی شەوی ڕابردوو، لە کاتی گەڕانەوەی لە بنکەیەکی دەنگدان، کادیرێکی لیژنەی ناوچەی بەکرەجۆ و یەکێتیی لاوان و قوتابییان لەلایەن هێزێکەوە دەڕفێنێنرێت و تاوەکو ئێستا چارەنووسی نادیارە.

چیرۆکی سەرەکی: کاتژمێر 12:20 خولەک ئامانج عەبدوڵڵا، کە کادیرێکی پارتییە لە سلێمانی لەگەڵ براکەی چاودێری حیزبەکەیان بوون لە وێستگەیەکی دەنگدان، هێزێک ئەو کادیرەی پارتی دەستگیر دەکەن بەبێ ئەوەی هۆکارەکەی ئاشکرا بکەن.

لێدوانی فەرمی: شڤان مەحموود، سکرتێری یەکێتیی قوتابییان و لاوان بە ئاڤای گوت، "هەڤاڵ ئامانج هیچ کێشەیەکی کۆمەڵایەتی نەبووە، بەشێوەیەکی ئاسایی بانگەشەی بۆ حیزبەکەی خۆی کردووە، لە شەوی ڕابردووەوە لەسەر هێڵین لەگەڵ هێزە ئەمنییەکانی سلێمانی، بەڵام تاوەکو ئێستا ڕوون نەبووەتەوە کە لەسەر چی و کێ ڕفاندوویەتی."

سکرتێری یەکێتی قوتابییان و لاوان، گوتیشی، "ئەو هێزە ئەمنییە ‌بڕیاری دادوەریان بۆ دەستگیرکردنی ئەو کادیرەمان نەبووە، سەلامەتی گیانی لە ئەستۆی هێزە ئەمنییەكانی یەكێتیی نیشتیمانیی كوردستانە، داواکارین بەزووترین کات ئازاد بکرێت؛ بەپێچەوانەوە هەموو ڕێكارێكی مەدەنی دەگرینەبەر."