مالیکی وەک نوێنەری شیعەکان سەردانی سەرۆک بارزانی دەکات

ئاڤا نیوز

نووری مالیکی، سەرۆکی هاوپەیمانی دەوڵەتی یاسا لە چەند ڕۆژی داهاتوودا سەردانی هەولێر دەکات و لەبارەی پێکهێنانی حکومەتی نوێ و دیاریکردنی سەرۆکوەزیران، لەگەڵ سەرۆک بارزانی کۆ دەبێتەوە.

وێنە گەورەکە: دوای ڕاگەیاندنی ئەنجامی هەڵبژاردنی عێراق لەلایەن کۆمیسیۆنەوە، پارتی وەک هێزێکی سەرەکی و کاریگەر لە عێراق زۆرترین دەنگی بەدەستتهێنا، بۆ پێکهێنانی حکومەتی داهاتوو، لایەنەکانی دیکە سەردانی دەکەن.

زانیاریی بەدەستهاتوو: بەپێی زانیارییەکانی ئاڤا، مالیکی وەکو سەرۆکی شاندی دانوستانکاری چوارچێوەی هەماهەنگی سەردانی هەولێر دەکات. لە کۆبوونەوەکاندا باسی بابەتی پێکهێنانی حکومەت و دیاریکردنی سەرۆکوەزیرانی داهاتووی عێراق دەکەن.

لە نزیکەوە گوێ لە سەرۆک بارزانی دەگرێت بزانن مەرج و داواکارییەکانی کورد چین بۆ پێکهێنانی حکومەتی داهاتوو.

زانیاریی تایبەت: بڕیار بوو مالیکی لە دهۆک بەشداریی مێپس بکات و وتاری هەبێت، بەڵام نەیتوانیبوو ئامادە بێت و نوێنەری ناردبوو، گوتبووی مێپس تەواو بێت خۆم بە تایبەت سەردانی هەولێر دەکەم.