ئەڵمانیا لە ڕێكخستنەوەی سەنگەرەكانی بەرگری هاوكاریی پێشمەرگە دەكات

ئاڤا نیوز

هێزەكانی ئەڵمانیا لە دروستكردنی سەنگەرەكانی بەرگری لە یەكە سەربازییەكاندا، هاوكاریی هێزەكانی پێشمەرگە دەكات، هاوكات خولێكی فریاگوزاریی سەرەتایی لە مەیدانی جەنگ و ڕووبەڕووبوونەوەدا، بۆ فیرقەیەكی پێشمەرگە دەكاتەوە.

چیرۆكی سەرەكی: فەرماندەیی هێزەكانی ئەڵمانیا لەچوارچێوەی هێزەكانی هاوپەیمانیی نێودەوڵەتی، بەردەوامە لە هاوكاریكردنی پێشمەرگە، لەو چوارچێوەیەشدا كۆڵۆنێڵ سێبەستیان كلینك، فەرماندەی هێزەكانی ئەڵمانیا لە هەرێمی كوردستان و شاندەكەی، بەیاوەری فەرماندەی فیرقەی چواری پیادە سەر بە وەزارەتی پێشمەرگە، سەردانی بەشێك لە سەنگەرەكانی بەرگریی پێشمەرگەی كرد.

لەلایەكی دیكەوە: پسپۆڕانی پزیشكیی ئەڵمانی، لە چوارچێوەی هێزەكانی هاوپەیمانیی نێودەوڵەتی، خولێكی فریاگوزاریی سەرەتایی لەبارەگای فیرقەی یەكی پیادە بۆ پەرەپێدانی تواناكانی هێزی پێشمەرگە ئەنجامدا. تێیدا؛ بەشێوەی تیۆری و پراكتیكی، مەشق و ڕاهێنان لەبارەی فریاگوزاریی تەندروستی لە مەیدانی جەنگ و ڕووبەڕووبوونەوە سەربازییەكان بە پێشمەرگە بەشداربووەكان کرا.

ڕاگەیێنراوی فەرمی: بەپێی ڕاگەیێنراوی فەرمیی وەزارەتی پێشمەرگەی هەرێمی كوردستان، هێزەكانی ئەڵمانیا، لەبواری پلانەكانی بەرگریكردن لەكاتی ڕوودانی هێرش و ڕووبەڕووبوونەوەكاندا ئەزموونی خۆیان تایبەت بە شێوازە نوێیەكانی سەنگەرسازی و دروستكردنی سەنگەرەكانی بەرگری لە یەكە سەربازییەكاندا، بە هێزەكانی پێشمەرگە گەیاند، هاوكات بەشێوەیەكی مەیدانی بەشێك لە سەنگەرەكانی پێشمەرگەیان بەسەركردەوە.