گەنجێکی کورد ئاوازێکی کوردی ئاوێتەی موزیکی کلاسیکی جیهانی دەکات

ئاڤا نیوز

 

گەنجێكی موزیكژەنی خەڵكی سلێمانی پارچە میوزیكێك بەناوی “كوردیش سیمفۆنیا” دەنووسێتەوە و میوزیكژەنێكی بەناوبانگی جیهان لە ئەمریكا بڵاوی دەكاتەوە.

 

چیرۆكی سەرەكی: ژەنیار ئارام، تەمەنی 25 ساڵە و توانیویەتی بە ئامێری ئۆرگن كە ئامێرێكی میوزیكیە (هێشتا لە كوردستان بەكارنەهێنراوە)، پارچەیەك میوزیكی كوردیی ڕەسەن بنووسێتەوە و ناردویەتی بۆ ژەنیارێكی بەنێوبانگی ئەمریكی.

ئاوازە كوردییەكە لە گۆرانییەكی مامۆستا مەزهەری خالقی وەرگیراوە بەناوی "بۆت دێنم"، بەشێوەیەكی هونەریی بەرز تێكەڵی موزیكە جیهانییەكە كراوە.

 

لێدوان: ژەنیار ئارام، قسەی بۆ ژیوار عەبدولڕەحمان، پەیامنێری ئاڤا لە سلێمانی كردووە و دەڵێت: دەمێك بوو دەمویست پارچە میوزیكێكی جیهانی بەناوی كوردستانەوە بنووسمەوە و بەهۆیەوە ناوی كوردستان لە جیهاندا بناسرێتەوە، لەكۆتاییدا توانیم ئەو خەونە بهێنمە دی.

هەروەها دەڵێت: دوای ئەوەی موزیكەكەم ئامادە كرد، ناردم بۆ خاتوو لیا كۆفمان، كە ژەنیارێكی بەناوبانگە لە ئەمریكا، خاتوو لیا نۆتەكانی زۆر بەدڵبوو و لەوێ بە شانازییەوە لەبەردەم هاوڕێكانیدا بەناوی كوردستانەوە میوزیكەكەی پێشكەش كردوون.

 

تایبەتمەندیی ئامێرەكە: موزیكژەنە كوردەكە دەڵێت، ئەو ئامێرەی میوزیكەكەم بۆ نوسیوەتەوە، لە هەموو عێراق و هەرێمی كوردستان نییە، هیوادارم بهێنرێت بۆئەوەی بەهۆیەوە بتوانین میوزیكی كوردی بەجیهانی بكەین.

باكگراوند: میوزیكەكە تێكەڵەیەكە لەنێوان دوو پارچە میوزیكی فۆلكلۆری كوردی و پارچە میوزیكێكی كلاسیكی جیهانی و شارەزایانی بواری موزیك ئاماژە بەوە دەكەن ریتمی موزیكی كوردی بەشێوەیەكە زۆر باش دەتوانرێت تێكەڵی موزیكی كلاسیكی و جیهانی بكرێت و خەڵكانێكی زۆر چێژ لە تایبەتمەندییەكانی وەردەگرن.