داشکان لە نرخی پارەی ئاوی ماڵان دەکرێت

ئاڤا نیوز

داشکان لە نرخی پارەی مانگانەی ئاو بۆ ئەو هاونیشتمانیانە کرا کە پێشتر پێوەری ئاویان نەبەستووە یان وەک هاوبەشی ئاو خۆیان تۆمار نەکردووە.

چیرۆکی سەرەکی: لەپێناو کەمکردنەوەی قەرزی کەڵەکەبووی کرێی ئاو لەسەر ئەو هاونیشتمانیانەی کە تاوەکو ئێستا وەک هاوبەشی ئاو خۆیان تۆمار نەکردبوو، بە بڕیارێکی ئەنجوومەنی وەزیرانی کوردستان داشکاندنیان لە نرخی کرێی ئاو بۆ کرا.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤا میدیای ڕاگەیاند، بە ئامانجی کەمکردنەوەی بەفیڕۆدانی ئاو و سوودمەندبوونی ئەو هاووڵاتیانەی کە پێشتر پێوەری ئاویان نەبەستووە یان وەک هاوبەشی ئاو خۆیان تۆمار نەکردووە، ئەنجوومەنی وەزیرانی کوردستان نرخی کرێی مانگانەی ئاو کەم دەکاتەوە بەشێوەی بڕاوە "مقطوع" بەم شێوەیە:

٠ بۆ ئەو هاونیشتمانیانەی نیشتەجێی سەنتەری شارە گەورەكانن، نرخی کرێی ئاو لە 45 هەزار دینار بۆ 20 هەزار دینار کەم دەکرێتەوە.  

٠ بۆ ئەو هاونیشتمانیانەی لە دەرەوەی سەنتەری شارە گەورەكانن، نرخی کرێی ئاو لە 45 هەزار دینار کەم دەکرێتەوە بۆ 10 هەزار دینار.

٠ سەرەڕای ئەمەش دەتوانن لە هەمان کاتدا سوودمەندبن لە داشکانی 20%ـی نرخی کرێی ئاو کە بۆ سەرجەم هاوبەشان هەیە، بەمەش هێشتا نرخی کرێیەکەیان کەمتر دەبێتەوە.

زانیاریی زیاتر: لە ڕۆژی 24-11-2025 بەڕێوەبەرایەتییەکانی ئاو و نووسینگەکانی کۆمپانیا ئامادەن بۆ ڕاییکردنی مامەڵەی ئەو هاونیشتمانیانەی لە بڕیارەکە سوودمەند دەبن، پێشووتر دووجار ئەم داشکاندنانە بۆ کرێی ئاو کرابوون، جارێک بۆ ماوەی دوو مانگ و جارێکیش بۆ ماوەی چوار مانگ، کە هاونیشتمانیەکی زۆر لێی سوودمەند بوون، بۆ جاری سێیەم داشکاندنەکە لە کرێی ئاو تاوەکو ڕۆژی 1-4-2026 بەردەوام دەبێت.

ئەمەش بزانە: لە ساڵی 2018 تاوەکو ساڵی 2021 بە بڕی 80 هەزار دینار مانگانە، لە ساڵی 2021 تاکو ئێستا بە بڕی 45 هەزار دینار مانگانە بەشێوەی بڕاوە "مقطوع"، کرێی ئاو بۆ ئەو هاووڵاتیانە ئەژمار دەکرا کە هاوبەشیان نەبوو یان پێوەری ئاویان نەبەستبوو.