عەلەوییەکان دژی حکومەتی ئەحمەد شەرع خۆپیشاندان دەکەن

ئاڤا نیوز

 

گرژییەکان لە سووریا پێ دەنێنە قۆناغێکی نوێوە و دەیان هەزار هاوڵاتی لە پێکهاتەی عەلەوی، دژی حکومەتەکەی ئەحمەد شەرع دەستیان بە خۆپێشاندانی سەرتاسەری کردووە و داوای جیابوونەوەی ئیداری و سیستەمی فیدراڵی دەکەن.

 

زانیاریی زیاتر: بەگوێرەی زانیارییەکان، دوای ئەوەی دوێنێ غەزال غەزال، سەرۆکی ڕۆحیی ئەنجوومەنی باڵای عەلەوییەکان داوای ئەنجامدانی خۆپێشاندانی کرد، ئەمڕۆ شەپۆلێکی ناڕەزایەتی فراوان شارەکانی حومس، لازقییە، بانیاس و تەرتووسی گرتەوە.

 

داواکارییەکان: خۆپێشاندەران کۆمەڵێک داواکاریی سەرەکییان خستووەتەڕوو، دیارترینیان بریتین لە: چەسپاندنی سیستەمی لامەرکەزی و فیدراڵیزم، ئازادکردنی دەستگیرکراوەکانیان، هەروەها کۆتاییهێنان بەو هەڵمەتانەی بە "پاکتاوی نەژادی، ڕفاندن و کوشتن" لەلایەن هێزە چەکدارەکانی حکومەتەوە وەسفی دەکەن.

 

لێدوانی فەرمی: ڕوانگەی سووری بۆ مافەکانی مرۆڤ لە ڕاگەیێنراوێکدا ئاشکرای کردووە، هێزە ئەمنییەکان بە توندوتیژی وەڵامی ناڕەزایەتییەکانیان داوەتەوە. بەپێی ڕاپۆرتەکە، لە گۆڕەپانی (زەهرا) لە شاری حومس، هێزەکان هەڵمەتی دەستگیرکردنیان ئەنجامداوە و لە چەندین شوێن گازی فرمێسکڕێژ و تەقەی هەڕەمەکییان دژی خۆپێشاندەران بەکارهێناوە.

 

لەلایەکی دیکەوە لە شاری لازقیە، خۆپێشاندەران وەک ئاماژەیەک بۆ ڕەتکردنەوەی دەسەڵاتی ناوەندی و داواکردنی سەربەخۆیی ئیداری، تابلۆی ناوی پارێزگاکەیان لەسەر باڵەخانەی پارێزگا لابردووە. لە بەرامبەردا هێزە ئەمنییەکان بەشێوەیەکی چڕ بڵاوەیان پێکراوە و ڕێگە سەرەکییەکانیان داخستووە بۆ ڕێگریکردن لە فراوانبوونی خۆپێشاندانەکان. بەگوێرەی ئامارە سەرەتاییەکان دەیان کەس برینداربوون، بەڵام تا ئێستا گیانلەدەستدان پشتڕاست نەکراوەتەوە.

 

باکگراوند: دۆخی سووریا لە قۆناغی دوای بەشار ئەسەد (کە خۆی سەر بە پێکهاتەی عەلەوی بوو)، ناجێگیرییەکی زۆری بەخۆیەوە بینیوە و ململانێی نێوان پێکهاتەکان و حکومەتەکەی ئەحمەد شەرع بەردەوامە. لە ماوەی ڕابردوودا شەڕێکی خوێناوی لەنێوان دروزەکان و هێزەکانی حکومەت ڕوویدا کە هەزاران قوربانی لێکەوتەوە، هەروەها پێشتریش پێکدادان لەنێوان عەلەوییەکان و هێزەکانی شەرع سەدان کوژراو و برینداری لێکەوتبووەوە.