ئاڤای خەڵک؛ گەڕەکی شەهیدانی ناحیەی کەورگۆسک لە هەولێر بەدەست چەندین کێشەوە دەناڵێنن

ئاڤا نیوز

 

دانیشتووانی گەڕەکی شەهیدان لە ناحیەی کەورگۆسک، نیگەرانی خۆیان لە نەبوونی خزمەتگوزارییە سەرەتاییەکان دەردەبڕن و بەڕێوەبەری ناحیەکەش ڕایدەگەیەنێت، لە ماوەی دوو هەفتەدا دەست بە جێبەجێکردنی پڕۆژەکان دەکرێت.

 

بەدواداچوونی ئاڤا: بەگوێرەی بەدواداچوونەکانی ئاڤا، دانیشتووانی گەڕەکی شەهیدان لە سنووری ناحیەی کەورگۆسکی سەر بە پارێزگای هەولێر، بەدەست نەبوونی تۆڕی ئاوەڕۆ، کەمئاوی و خراپیی ڕێگەوبان و نەبوونی قیر و کۆنکرێتەوە دەناڵێنن.

 

جەرجیس محەممەد، کە یەکێکە لە دانیشتووانی گەڕەکەکە ئاماژە بەوە دەکات، نزیکەی 300 ماڵ لەم گەڕەکەدا نیشتەجێن و لە هەموو ڕوویەکەوە "پشتگوێ خراون". ناوبراو وتی: "بێ خزمەتگوزارین و داواکارین لە لایەنە پەیوەندیدارەکان ئاوڕمان لێ بدەنەوە و کێشەکانمان بۆ چارەسەر بکەن."

 

لێدوانی فەرمی: حەیات زراری، بەڕێوەبەری ناحیەی کەورگۆسک بەدواداچوونی بۆ داواکاریی هاووڵاتییان کرد و ڕایگەیاند، بڕی 80 ملیۆن دینار بۆ جێبەجێکردنی پڕۆژەکانی ئاوەڕۆ و چاککردنی شەقام و کۆڵانەکانی ئەو گەڕەکە تەرخانکراوە.

 

بەڕێوەبەری ناحیەی کەورگۆسک جەختیشی کردەوە: "لەم یەک دوو هەفتەیەدا دەست بە کارەکان دەکەین و خزمەتگوزارییەکان دەگەیەنینە گەڕەکەکە."

 

ئەوەی پێویستە بیزانیت: سەبارەت بە کێشەی ئاوی خواردنەوەش، بەرپرسانی ناحیەکە ڕوونیان کردەوە کە چارەسەری بنەڕەتیی کێشەی کەمئاوی لەو گەڕەکە، بەستراوەتەوە بە تەواوبوونی پڕۆژەی ئاوی قەزای خەبات، کە بە تەواوبوونی، گرفتەکە کۆتایی پێ دێت.