ئێران بەدوای ڕووفاتی سەربازە بێسەروشوێنبووەکانی جەنگی عێراق و ئێران دەگەڕێت

ئاڤا نیوز

 
کۆماری ئیسلامیی ئێران لەڕێگەی دەستەیەکی تایبەت، ئامادەکاری دەکات بۆ گەڕان بەدوای دۆزینەوەی ڕووفاتی سەربازە بێسەروشوێنبووەکانی جەنگی هەشت ساڵەی نێوان عێراق و ئێران.

 
چیرۆکی سەرەکی: دوای تێپەڕبوونی 37 ساڵ بەسەر کۆتاییهاتنی جەنگی نێوان عێراق و ئێران، بەڵام تائێستا بە هەزاران سەربازی نێوان هەردوولا بێ سەروشوێنن. دەستەی گەڕان بەدوای سەربازە بێسەروشوێنبووەکانی کۆماری ئیسلامیی ئێران، لە داهاتوویەکی نزیکدا لە سنووری حاجی ئۆمەران و دەوروبەری، هەڵمەتێکی گەڕان بەدوای دۆزینەوەی ڕووفاتی سەربازە بێسەروشوێنبووەکانی جەنگی نێوان عێراق و ئێران ئەنجام دەدات.

 
لێدوانی فەرمی: ئارام نووری، بەڕێوەبەری گشتیی گۆڕە بەکۆمەڵەکان لە وەزارەتی کاروباری شەهیدانی هەرێمی کوردستان بە ئاڤا میدیای ڕاگەیاند، ئەو کۆمیتە سێ لایەنەی نێوان عێراق و ئێران و خاچی سووری نێودەوڵەتی، بە ئامانجی دیاریكردنی چاره‌نووسی سه‌ربازە بێسه‌روشوێنەکانی جه‌نگی نێوان عێراق و ئێران، هه‌وڵە‌ مرۆییەکانیان بەردەوامە و ڕۆژی 25-11-2025 لە شاری هەولێر کۆبوونەوە و ئەمڕۆ 26-11-2025، دیدارەکانیان بەردەوامی دەبێت، تێیدا ئامادەکاری بۆ هەڵمەتێکی گەڕان بە دوای ڕووفاتەکان دەکرێت. 

 

زانیاریی زیاتر: هەرچەندە لایەنی عێراقی ئامارێکی دروستی بڵاونەکردۆتەوە، بەڵام لەماوەی ڕابردوودا بە هەزاران ڕووفاتی سەربازی عێراقی لە ناوچە سنوورییەکانی ئێران گەڕێندراونەتەوە بۆ عێراق، لەکاتێکدا تائێستا بە درێژایی ناوچە سنوورییەکانی نێوان عێراق و کۆماری ئیسلامیی ئێران، نزیکەی 45 هەزار ڕووفاتی سەربازانی ئێرانی گەڕێندراونەتەوە وڵاتەکەیان، مەزەندەش دەکرێت سەرووی هەزار و 500 ڕووفاتی سەربازی ئێرانی لە ناوچە سنوورییەکانی نێوان هەرێمی کوردستان و وڵاتی ئێران هەبن.

 
باکگراوند: ڕۆژی 22-9-1980، جەنگی نێوان عێراق و ئێران دەستیپێکرد، دوای زەرەر و زیانێکی زۆر و کوژران و بێسەروشوێنبوونی سەدان هەزار سەرباز لە هەر لایەکیان، ڕۆژی 8-8-1988 بە فەرمی وەستانی جەنگی نێوان هەردوولا ڕاگەیێندرا.