سەرۆکوەزیرانی کوردستان بەردی بناغەی کارگەیەکی بەرهەمهێنانی مۆبایلی زیرەک دادەنێت

ئاڤا نیوز

 

سەرۆکوەزیران مەسرور بارزانی لە شاری هەولێر بەردی بناغەی کارگەیەکی بەرهەمهێنانی مۆبایلی زیرەک و تابلێت (زێڕین2) دادەنێت، کە دەبێتە هۆی ڕەخساندنی هەلی کار بۆ سەدان گەنج.

 

وێنە گەورەکە: کابینەی نۆیەمی حکومەتی هەرێمی کوردستان بایەخی زۆر دەدات بە دروستکردنی ژێرخانێکی ئابووریی بەهێز و پێدانی دەرفەتی کارکردن و پێشخستنی تەکنەلۆژیا، لەم ڕوانگەیەوە ئەمڕۆ 2025-11-26، سەرۆکوەزیران مەسرور بارزانی بەردی بناغەی کارگەی تەکنەلۆژیای زێڕین 2 دادەنێت کە تایبەتە بە بەرهەمهێنانی مۆبایلی زیرەک و تابلێت لە هەرێمی کوردستان.

 
لێدوانی فەرمی: بەرگەشت ئاکرەیی وتەبێژی دەستەی وەبەرهێنانی هەرێمی کوردستان بە ئاڤا میدیای گوت، ساڵی ڕابردوو بەرهەمهێنانی مۆبایلی زیرەک لە شاری هەولێر دەستیپێکرد، پرۆژەکە هی وەبەرهێنەر و دەستی کاری ناوخۆییە بە هاوبەشی لەگەڵ کۆمپانیاییەکی چینی، ئێستا خواستێکی زۆر لەسەر مۆبایلەکە هەیە و هەناردەی چەند وڵاتێکی عەرەبی دەکرێت، بۆیە پرۆژەکە فراوان دەکرێت و وەکو کارگەیەکی پێشکەوتوو و سەردەمی بەردی بناغەی دادەنرێت، بەشێوەیەک کە کارگەی هاوشێوە لەسەر ئاستی عێراق و ناوچەکە بوونی نییە.

 

زانیاریی زیاتر: كارگه‌کە به‌ یه‌كه‌مین چالاكی به‌رهه‌مهێنانی ئه‌لیكترۆنی و مۆبایل و تابلێتی زیره‌ك داده‌نرێت له‌سه‌ر ئاستی ناوچه‌كه‌ کە به‌ ده‌ست و‌ په‌نجه‌ی گه‌نجانی‌ كوردی‌ ده‌رچووانی زانكۆ و په‌یمانگاكانی كوردستانە. بە دانانی بەردی بناغەی کارگەی تەکنەلۆژیای زێڕین 2 بۆ فراوانکردنی پرۆژەی بەرهەمهێنانی تابلێت و مۆبایلی زیرەک، دەبێتە ڕەخساندنی هەلی کار بۆ نزیکەی 400 گەنج، توانای به‌رهه‌مهێنانی مانگانه‌ی دەگاتە سه‌رووی 100 هەزار مۆبایل و تابلێت زیره‌ك‌. 

 

ئەمەش بزانە: ئەمڕۆ لەگەڵ دانانی بەردی بناغەی کارگەی تەکنەلۆژیای زێڕین 2، نوێترین ڤێرژنی مۆبایلی زیرەک ڕادەگەیێنرێت  و پێشکەشی سەرۆکوەزیران دەکرێت.