هێزێکی ئەمنیی یەکێتی ڕۆژنامەنووسێک لە کەلار دەستگیر دەکات

ئاڤا نیوز

 

لە شەوی ڕابردووەوە هێزەکانی ئاسایش بەشی ئۆپەراسیۆنی یەکێتی ڕۆژنامەنووسێکیان لە کەرلار دەستگیرکردووە و تاوەکو ئێستا هۆکاری دەستگیرکردنەکەی ئاشکرا نەکراوە.

 

چیرۆکی سەرەکی: کاتژمێر شەشی ئێوارە ڕۆژی سێشەممە 25-11-2025 هێزێکی ئەمنی یەکێتی لە قەزای کەلار، کاروان کەلاری، بەڕێوەبەری ڕادیۆی کازیوەی دەستگیرکردووە،  ئێستا مۆبایلەکەی کووژاوەتەوە و هیچ سۆراغێکی نییە.

 

لێدوانی فەرمی: حوسێن کەلاری، بەرپرسی لقی 22ی گەرمیانی پارتی بە ئاڤای گوت، "کاروان کەلاری لە لایەن هێزەکانی ئاسایش بەشی ئۆپەراسیۆنەوە دەستگیرکراوە ئێستا لە سلێمانیە، هێزە ئەمنییەکانی ئەو سنوورە هۆکاری دەستگیرکردنەکەی ناخەنەڕوو، تەنیا ئەوە دەڵێن کە ڕەوانەی سلێمانی کراوە."

 

ڕاگەیێنراوی فەرمی: دوای دەستگیرکردنی کاروان کەلاری، کازیوە میدیا ڕاگەیێنراوێکی بڵاو کردەوە و تیایدا هاتووە، "بە نیگەرانی زۆرەوە ئاگادارتان دەکاتەوە کە کاروان کەلاری، ڕۆژنامەنووس و بەرپرسی کازیوە میدیا، لە ڕۆژی 25ی 11ـی 2025، لە کاتژمێر 6:00ی ئێوارەوە بێسەروشوێنە، کازیوە میدیا و خانەوادەکەی هیچ زانیارییەکیان لەبارەی شوێن یان دۆخی تەندروستی نییە.

کازیوە میدیا داوا لە هێزە ئەمنییەکانی سنوورەکە دەکات "دەستبەجێ دەست بە گەڕان و لێکۆڵینەوە بکەن و پاراستنی گیان و سەلامەتی کاروان کەلاری دەخەینە ئەستۆیان، ئێمە لە کازیوە میدیا هەموو ڕێکخراوەکانی مافی مرۆڤ و میدیاییەکان لەم دۆخە ئاگادار دەکەینەوە".