یەكێتی لە داوی پۆپۆلیزمدا

پەیوەندی یەكێتیی نیشتمانیی كوردستان و پۆپۆلیزمی سیاسی پەیوەندییەكی نزیكایەتیە، واتە هەندێ كات دەستوپەنجە لەگەڵ یەكتر دەشێلن بەڵام چارەنوسێكی حەتمیشیان پێكەوە نەبووە.

بەو پێیەی ناوچەكەی زەوییەكی بەپیت و بەرهەمهێنە بۆ ئەم جۆرە لە گوتار بۆیە هەمیشە یەكێتی پێویستی بەوە بووە بەرامبەر ئەم گوتارە سیاسەت و ستراتیژێك پەێڕەو بكات. لە قۆناغی پێشوودا ستراتیژی  یەكێتی ئەوە بووە دەنگ و هێزە پۆپۆلیزمەكانی لە بەرژەوەندی خۆی بەكار بهێنێتەوە. لە ماوەكانی ڕابردوودا ئەمەمان بینیوە و یەكێتی مامەڵەیەكی زیرەكانەی درێژخایەنی لەگەڵ ئەم دیاردەیەدا كردووە و یەكێك لە ستراتیژەكانیشی ئەوە بووە بەرەو دەرەوەی خۆی ئەم گوتارەی  ئاراستە كردوە.

 

بەڵام ئەم نزیكایەتیەی نێوان یەكێتی وەك حیزبێكی فەرمانڕەوا و پۆپۆلیزم وەك دەرهاوێشتەیەكی شەقامی ناڕازی (دەڵێین دەرهاوێشتەیەك نەك تاكە دەرهاوێشتە) جۆرێك لە یاریكردن بووە بە ئاگر و هەردوولاش بەیەك كاریگەر بوون.

لە چەند هەڵبژاردنی ڕابردوودا یەكێتی نیشتمانی وەك گوتار تارادەیەكی زۆر لە گوتاری پۆپۆلیزم بەتەواوی نزیك بوویەوە و بەكاری هێنا، بەڵام هەر زوو پاش هەڵبژاردنەكان گوتارە پۆپۆلیستیەكەی خۆی كەنارخست و گەڕایەوە سەر گوتاری دەسەڵاتدارێتی و بەرپرسیارێتی و ڕیاڵیتی. بێگومان مەبەستمان لە پۆپۆلیزم ئەو گوتارە میللیگەرا توندەیە كە لەسەر بنەمایەكی زانستی واقیعی عەقڵگەرا دانەمەزراوە، بەڵكو لەسەر بنەمای گوتارێكی توندی ڕەتكەرەوەی سۆزگەرا كە ختوكەی هەست و سۆزی ڕای گشتی دەدات، دامەزراوە. 

یەكێتی نیشتمانی لەبەر ئەوەی  لە بنەماوە چ وەك پێگە و چ وەك عەقڵی سیاسی لە كێشە و مەترسییەكانی گوتاری پۆپۆلستی تێدەگات، بۆیە ناچار نەبووە ڕاستەوخۆ و هەمیشە هەڵگری ئەو گوتارە بێت، بەڵام لەبەر ئەوەی لە ناوچەیەكدا كە لەباریایە بەرهەمهێنەری ئەم گوتارە بێت دەژی و ناوچەیەكی یاخی و شۆڕشگێڕ و گۆڕانخوازە و بەم گوتارەش دەورە دراوە، هەربۆیە ناچار بووە مامەڵەی لەگەڵ بكات و دەستوپەنجەی لەگەڵ بشێلێ. 

ئەوەی لێرەدا مەبەستمە بیڵێم ئەوەیە یەكێتی نیشتمانی تا قۆناغی پێش هەڵبژاردنەكانی 2025 یش توانیبووی ڕامی ئەسپی سەرشێتیی پۆپۆلیزم بكات و لەبەرژەوەندی خۆی كاری بهێنێت، بەڵام لەو بەروارە بەدواوە شیمانەی ئەوە دەكرێ خۆی بكەوێتە بەرپێ و ناو داوی ئەم گوتارە ناكامەوە. ئەمەش مەترسیدارتیرین قۆناغە كە یەكێتی تێ بكەوێت.

عەقڵی سیاسی و ئیرادەی سیاسیی یەكێتی دەبێ زۆر وریای ئەوە بێت بكەوێتە ناو ئەو گوتارە پۆپۆلیستەی لە هەموو لایەكەوە دەورەی داوە و خەریكە جڵەوی سیاسەتەكانی  ئاراستە بكات.

واتە یەكێتی دەبێت هۆشیار بێت بەوەی ئەو چ وەك شوێن و چ وەك قۆناغ دووروو پارێزراو نییە لە گوتار و سیاسەتی پۆپۆلیزم، بەڵام پێگە و شوێنی ئەو وەك بەشێك لە دەسەڵات ڕێگەی پێنادات هەڵگری ئەمە گوتارە بێت، چونكە زۆر بە سادەیی گوتاری پۆپۆلیست بە حیزبی دەسەڵات ناخوا و پۆپۆلیزم ئەگەر گونجاویەكی هەبێت زیاتر بۆ حیزبە كانی دەرەوەی دەسەڵاتە.  

بۆیە یەكێتی ناچارە و  دەبێت زۆر هۆشیارانە مامەڵە لەگەڵ ئەم قۆناغە سیاسیەی خۆی بكات و ستراتیجی ئەوەبێت عەقڵانیەت و واقیعیەت بەسەر خەون و خەیاڵ و گوتاری شۆڕشگێڕانەی سۆزگەرادا زاڵ بكات.

واتە بەرپرسیارێتی و حوكمڕانێتی و كار  بخاتە پێش جەماوەرێتیی و گوتارەوە، دەنا هەردووكیانی لەدەست دەچێت.