لە چەند شەقامێکی هەولێر خێرای ڕێگەپێدراو بەرز دەکرێتەوە

ئاڤا نیوز

لەماوەی هەفتەیەکدا بەڕێوەبەرایەتیی هاتووچۆی هەولێر، خێرایی ڕێگەپێدراوی لە چەند شەقامێکی هەولێر بەرزکردووە بە ئامانجی کەمکردنەوەی قەرەباڵغی و ڕزگاربوون لە خنکانی شەقامەکان.

وێنە گەورەکە: بەمەبەستی کەمکردنەوەی ڕووداوەکانی هاتووچۆ، بەڕێوەبەرایەتیی هاتووچۆی هەولێر زۆربەی شەقام و ڕێگاکانی بە کامێرای تۆمارکردنی تیژڕۆیی کۆنتڕۆڵ کردووە، هاوکات بۆ ئەوەی قەرەباڵەخی و خنکانی هاتووچۆ دروست نەبێت، لە تونێڵی پیرمام و دوو شەقامی ناوەوەی هەولێر، خێرایی ڕێگەپێدراوی لێخوڕینی ئۆتۆمبێلی بەرز کردووەتەوە. 

ڕاگەیێنراوی فەرمی: بەڕێوەبەرایەتیی هاتووچۆی هەولێر لە سێ کاتی جیاجیادا بڵاویکردووەتەوە، خێرایی ڕێگەپێدراوی لێخوڕینی ئۆتۆمبێل لە چەند شوێنێک بەمشێوەی خوارەوە بەرز کرایەوە: 

-    خێرایی ڕێگەپێدراو لە شەقامی 100 مەتریی ڕێگای هەولێر - کەرکووک تاوەکو شەقامی 120 مەتری، 60 کیلۆمەتر لە کاتژمێرێک بۆ 80 کیلۆمەتر لە کاتژمێرێک بەرزکرایەوە.

-    خێرایی ڕێگەپێدراو لە شەقامی 100 مەتریی ڕەشکین تاوەکو فەرماندەیی زێرەڤانی، 60 کیلۆمەتر لە کاتژمێرێک بۆ 80 کیلۆمەتر لە کاتژمێرێک بەرزکرایەوە. 

-    خێرایی ڕێگەپێدراوی تونێلی پیرمام، 70 کیلۆمەتر لە کاتژمێرێک بۆ 80 کیلۆمەتر لە کاتژمێرێک بەرزکرایەوە.